Ózbekstan Respublikası Prezidenti Shavkat Mirziyoev Evropa keńesiniń Prezidenti Antoniu Koshta hám Evropa komissiyasınıń Prezidenti Ursula fon der Lyayenniń mirát etiwine bola 23-24-oktyabr kúnleri rásmiy sapar menen Bryussel qalasında boladı.

Sapar baǵdarlamasına muwapıq, Evropa Awqamınıń paytaxtında usı awqamnıń tiykarǵı institutlarınıń basshıları menen eki tárepleme sóylesiwler ótkeriliwi rejelestirilgen.
Kóp táreplemeli qatnasıqlardı usı jıldıń aprel ayında Samarqand qalasında bolıp ótken joqarı dárejedegi ushırasıwda erisilgen kelisimlerdi ámelge asırıw sheńberinde bunnan bılay da rawajlandırıw hám keńeytiwdiń áhmiyetli máseleleri kórip shıǵıladı.
Sawda-ekonomika, investiciya-qarjı, innovaciya, energetika, transport-kommunikaciya, ilim-bilimlendiriw hám basqa da tiykarǵı tarawlarda ámeliy birge islesiw boyınsha anıq joybarlar menen baǵdarlamalardı alǵa qoyıw dıqqat orayında boladı.
Ózbekstan hám Evropa Awqamı arasında Keńeytilgen sheriklik hám birge islesiw haqqındaǵı kelisimge qol qoyılıwı názerde tutılǵan.
Sapar etiw sheńberinde Ózbekstan jetekshisi Belgiya basshılıǵı menen ushırasıw ótkeredi, texnologiyalıq hám sanaat kooperaciyasın rawajlandırıw boyınsha birgeliktegi rejelerdi jedellestiriw maqsetinde Evropanıń jetekshi kompaniya hám bankleriniń basshıların qabıllaydı.

ÓzA