Sońǵı jılları elimizde joqarı oqıw orınlarında bilimlendiriwdiń sapasın arttırıwdıń tiykarǵı faktorlarınıń biri sıpatında professor-oqıtıwshılardı ilimiy-izertlewge baǵdarlaw, olardıń ilimiy potencialın kóteriw arqalı dúnya júzlik ilimiy jámiyetshilikte, xalıqaralıq abıraylı ilimiy-texnikalıq bazalarda óz ornına iye bolıwına ayrıqsha dıqqat qaratılmaqta. Bul baǵdarda Prezidentimiz tárepinen bir qatar qarar hám pármanlar qabıl etilip, joqarı oqıw orınlarınıń aldına rawajlanǵan mámleketler tájiriybesin engiziwde xalıqaralıq kriteriyalar tiykarında islep shıǵılıp, jańadan-jańa talaplar hám wazıypalar belgilep berildi.

Ózbekstan Respublikası Joqarı bilimlendiriw, ilim hám innovaciyalar ministriniń 2024-jıl 20-marttaǵı 76-sanlı buyrıǵına tiykar, usı jıldıń 22-oktyabr kúni Berdaq atındaǵı Qaraqalpaq mámleketlik akademiyalıq muzıkalı teatrında filialdıń “Jańa Ózbekstanda mádeniyat hám kórkem óner tarawınıń rawajlanıw tendenciyaları” atamasındaǵı xalıqaralıq ilimiy-ámeliy konferenciya bolıp ótti.
Ilajǵa mámleketimizdiń barlıq aymaqlarınan tısqarı, Rossiya, Qazaqstan, Qırǵız Respublikalarınan belgili ilimpazlar, kórkem ónertanıw boyınsha izleniwshiler, filial professor-oqıtıwshıları hám student-jaslar qatnastı.
Ánjumanda Qaraqalpaqstan Respublikası Joqarǵı Keńesiniń komitet baslıǵı M.Atamuratov shıǵıp sóylep, konferenciyanıń ashılıwı menen Qaraqalpaqstan Respublikası Joqarǵı Keńesi hám Ministrler Keńesi atınan qutlıqladı.
Konferenciyanı filial direktorı wazıypasın atqarıwshı Q.Yusupov basqarıp bardı.
Onda Ózbekstan mámleketlik kórkem óner hám mádeniyat institutı “Kórkem ónertanıw hám mádeniyat tanıw” kafedrası professorı, tariyx ilimleriniń doktorı Abduxalil Mavrulov “Zamanagóy sharayatta mádeniyat fenomenin úyrneiwdiń ózine tánligi” atamasında, M. Áwezov atındaǵı Qubla-Qazaqstan universiteti “Ulıwma tariyx hám muzey isi» kafedrası baslıǵı, tariyx ilimleriniń kandidatı, docent Gúljan Otarbaeva “Zamanagóy kitapxanashı: dástúr hám innovaciyalar úylesimliligi” atamasında, Ózbekstan mámleketlik kórkem óner hám mádeniyat institutı “Mádeniyat hám kórkem óner menedjmenti” kafedrası baslıǵı, Kórkem ónertanıw ilimleri boyınsha filosofiya doktorı (PhD), docent Sayfullo Ikromov “Mádeniy ilajlardı shólkemlestiriw hám basqarıw metodlarınıń zamanagóy tendenciyalari” atamasında, kórkem ónertanıw ilimleriniń kandidatı, Dina Nurpeisova atındaǵı Qazaq xalıq sazları akademiyalıq orkestri solisti Aqnar Sharipbaeva “Qazaqstan muzıka tálimi sistemasında dástúriy qobızdıń ornı ” atamasında, Qaraqalpaqstan xalıq baqsısı, Ózbekstan mámleketlik kórkem óner hám mádeniyat institutı Nókis filialı “xalıq dóretiwshiligi” kafedrası baslıǵı, professor Gúlbáhár Axımbetova “Saz, sóz háreketlerdi ózinde jámlegen janr” atamasında, X.A. Yassauiy atındaǵı xalıq aralıq qazaq-túrk universiteti “Atqarıwshılıq kórkem óneri” kafedrası úlken oqıtıwshısı Alımbay Botakaraev “Teatr hám muzıka” atamasında, Ózbekstan mámleketlik kórkem óner hám mádeniyat institutı Nókis filialı “Mádeniyattanıwshılıq” 2-basqısh magistrantı Shaxsanem Sultamuratova “Kinematografiyada generativ jasalma intelekttiń roli” atamasında bayanatlar jasadı.
Ilajda mádeniyat hám kórkem óner tarawınıń búgingi máseleleri, mashqalaları hám olardıń sheshimi tuwralı bahalı pikirler hám usınıslar bildirildi.
Ilaj filial student-jaslar tárepinen tayarlanǵan koncert baǵdarlaması menen dawam etti.
Ánjuman sekciyalarǵa bólingen halda dawam etpekte.

Qaraqalpaqstan xabar agentligi