Italiya húkimeti Ukraina qorǵanıwın qollap-quwatlaw maqsetinde AQSh basshılıǵındaǵı PURL (Prioritized Ukraine Request List) baǵdarlamasında qatnasıwǵa tayar ekenin bildirdi, dep xabar berdi “Bloomberg” basılımı.

Bul baǵdarlama Kievke “Patriot” hawa qorǵanıw sistemaları hám basqa túrdegi zamanagóy qural-jaraqlardı AQSh arqalı satıp alıw imkaniyatın beredi. Joybarǵa bola, qarjılar Evropa mámleketleri tárepinen ajıratıladı.
NATO bas xatkeri Mark Ryutteniń málim etiwinshe, alyansqa aǵza 32 mámlekettiń yarımınan kóbi baǵdarlamada qatnasıwǵa razı bolǵan. Baltıq boyı hám Evropanıń arqasındaǵı ayırım mámleketler Ukraina ushın jańa áskeriy járdem paketin islep shıqpaqta.
Dereklerge bola, Ukrainanı sentyabr ayına shekem altı mámleket shama menen 2 milliard dollar qarjı menen qollap-quwatlaǵan. Bul bolsa rejelestirilgen puldan biraz az. Sonıń menen birge, Rossiyanıń Ukraina infrastrukturasına hújimleri kúsheygen sharayatta jańa qarjı dáreklerin tabıw barǵan sayın qıyınlaspaqta.
Italiya baǵdarlamada qatnasıwǵa aldın qarsı bolǵan edi. Biraq NATO awqamlaslarınıń basımı hám “baslamadan shette qalıw qáwpi” rásmiy Rimniń poziciyasın qayta kórip shıǵıwǵa iytermeledi.
Italiya usı waqıtqa shekem Ukrainaǵa on áskeriy járdem paketin tayarlawda qatnasqan bolıp, olardıń quramında “SAMP/T” túrindegi hawa qorǵanıw sistemaları da bar. Soǵan qaramastan, járdemniń anıq quramı sır saqlanbaqta.
Bas ministr Jorja Meloni mámleket byudjeti sheklengenine qaramastan, Ukrainanı siyasiy hám áskeriy qollap-quwatlawdı dawam ettirmekte.
Ekspertlerdiń pikirinshe, Italiyanıń PURL baǵdarlamasına qosılıwı EAnıń Ukrainaǵa áskeriy járdem beriwde birden-bir kózqarasın bekkemleydi hám Kiev qorǵanıwı ushın áhmiyetli strategiyalıq qádem sıpatında bahalanadı.

Dilshod HAKIMOV, ÓzA