Bul haqqında Prezident Shavkat Mirziyoevtiń basshılıǵında jasalma intellekt texnologiyaların rawajlandırıw boyınsha bolıp ótip atırǵan videoselektor májilisinde atap ótildi.

Prezidentimiz dúnyada jasalma intellektke talap artıp baratırǵan házirgi dáwirde básekige shıdamlı bolıw ushın 3 eń tiykarǵı másele – infrastruktura, ashıq maǵlıwmatlar hám kadrlar tayarlawǵa itibardı kúsheytiw zárúr ekenligin atap ótti.
Segiz jılda 300 mıń kilometr optikalıq talshıqlı baylanıs liniyaları qurıldı, elatlı punktlerdiń 99 procenti mobil baylanıs penen qamtıp alındı. Úlken kólemdegi maǵlıwmatlardı qayta islew hám saqlaw ushın 7 data-oray iske qosıldı.
Kelesi jılı densawlıqtı saqlaw, energetika, bank-qarjı, bajıxana-salıq, transport, taw-kán hám awıl xojalıǵı tarawlarında jasalma intellekt boyınsha 100 joybar rejelestirilgen.
Bulardı ámelge asırıw ushın soǵan sáykes quwatlıqlar, zamanagóy super-kompyuterler kerek. Biraq házirgi quwatlıqlar tek ǵana kishi joybarlardı iske qosıw ushın jetedi.
Aqıbetinde isbilermenler óz joybarı ushın sırt eldegi infrastrukturadan paydalanıp, oǵan millionlaǵan dollar jumsamaqta.
Sonıń ushın, usı jılı 16 superkompyuter satıp alıw ushın 50 million dollar ajıratıldı. Kelesi jılı bul qarjı 2 esege arttırılatuǵını járiyalandı.

ÓzA