Búgingi kúnde bárshemiz Ózbekstannıń insanıylıq siyasatı, ásirese, balalardıń táǵdirine biypárwa bolmaǵan jámiyet qurıw jolındaǵı ámeliy qádemleriniń gúwası bolıp atırmız. Qazaqstan Respublikasınan tórt jas óspirim bala watanına qaytarıldı.

Bul insanıylıq ilaj Ózbekstan Respublikası Sırtqı isler, Ishki isler, Densawlıqtı saqlaw ministrlikleri hám Prezident janındaǵı Sociallıq qorǵaw milliy agentliginiń birgeliktegi háreketleri nátiyjesinde ámelge asırıldı.
Balalar Nókis xalıqaralıq aeroportında Sociallıq qorǵaw milliy agentliginiń Qaraqalpaqstan Respublikası basqarması hám Qaraqalpaqstan Respublikası Ishki isler ministrliginiń juwapker wákilleri tárepinen kútip alındı.
Dáslep, olar medicinalıq tekseriwden ótkerildi, sońınan sociallıq-psixologiyalıq beyimlesiw ushın barlıq zárúr sharayatlar jaratılǵan shańaraqlıq balalar úyine ornalastırıldı.
Bul ilajlar balalardıń turaqlı sociallıq beyimlesiwi, qáwipsiz ortalıqta ósiwi, sonday-aq, olardı jámiyetlik turmısqa tolıq reintegraciyalawǵa xızmet etedi.

Qaraqalpaqstan xabar agentligi