Búgingi sanlı dáwirde balalardıń sabaq hám dem alıw waqtınıń úlken bólegi gadjetler menen baylanıslı. Biraq olardıń uzaq múddet ekran aldında otırıwı kóz salamatlıǵına unamsız tásir kórsetiwi múmkin.

Sonlıqtan, Sanitariyalıq-epidemiologiyalıq tınıshlıq hám jámiyetlik salamatlıq komiteti tárepinen balalar ushın gadjetlerden paydalanıw boyınsha gigienalıq talaplardıń jańa tártibi belgilendi.
Qánigelerdiń atap ótiwinshe, monitor yamasa planshetten paydalanıwda ekran menen kóz arasındaǵı aralıq keminde 70 santimetr, jumıs betine shekem bolsa 25 santimetrden kem bolmawı kerek. Jumıs ornı shep tárepten tábiyǵıy jaqtılıq túsetuǵin tárizde jaylastırılsa, kózge túsetuǵin zorıǵıw kemeyedi. Sonday-aq, oqıwshılarǵa turaqlı kóz gimnastikası shınıǵıwların orınlaw usınıs etiledi.
5 jasqa shekemgi balalarǵa elektron bilimlendiriw qurallarınan paydalanıw qatań qadaǵan etiledi. Sebebi bul jasta balanıń kóz bulshıq etleri tolıq qáliplespegen boladi hám ekran nurları kóriw qábiletine keri tásir kórsetiwi múmkin.
1-4-klass oqıwshıları sabaq procesinde gadjetlerden 10-20 minut, 5-11-klasslar bolsa 15-35 minut dawamında paydalanıwı múmkin. Úy hám mekteptegi ulıwma paydalanıw múddeti bolsa oqıwshınıń jası hám klasına qarap 80-170 minut aralıǵında belgilengen.
Eger bala kózdiń qızarıwı, gúńgirtlesiwi, bas yamasa moyın awırıwınan shaǵım etse, bul artıqsha ekran júklemesiniń belgisi bolıwı múmkin. Bunday jaǵdayda bala shıpaker kórigine jiberiliwi kerek.

M.Hojiakbarova, ÓzA