20-oktyabr kúni Samarqand qalasında Oraylıq Aziya mámleketleri qorǵanıw ministrleriniń birinshi ushırasıwı ótkerildi.
Ilaj aldınan qatnasıwshılar qaladaǵı eslew maydanında bolıp, Hásiretli ana esteligine gúller qoydı.

Ushırasıwda Ózbekstan, Qazaqstan, Qırǵızstan, Tájikstan hám Túrkmenstan qorǵanıw ministrleri qatnastı.
Oraylıq Aziya mámleketleri qorǵanıw ministrleriniń birinshi ushırasıwına Ózbekstan Respublikası qorǵanıw ministri, general-leytenant Shuhrat Xolmuhamedov basshılıq etti.
Ózbekstan Respublikası Prezidenti Shavkat Mirziyoevtiń ushırasıw qatnasıwshılarına múrájatın Prezident janındaǵı Qáwipsizlik keńesiniń xatkeri V.Mahmudov oqıp esittirdi.
Mámleketimiz basshısı óziniń múrájatında keyingi jılları Oraylıq Aziya mámleketleri arasında jaqın qońsıshılıq hám óz-ara isenim ruwxındaǵı qatnasıqlar konstruktivlik sóylesiw hám strategiyalıq sheriklik dárejesine kóterilgenin atap ótip, bul baylanıslar áskeriy qorǵanıw tarawında da izbe-iz rawajlanıp atırǵanın atap ótken. Ásirese, búgin dúnyada júz berip atırǵan global ózgerisler, xalıqaralıq hám regionallıq mashqalalar, qáwipsizlik hám turaqlılıqqa qáwipler kúsheyip atırǵan bir waqıtta qorǵanıw ministrlikleriniń óz-ara birge islesiwi oǵada úlken áhmiyetke iye.
Sonday-aq, Prezidentimiz klimat ózgeriwi mashqalaları, suw resurslarınan nátiyjeli paydalanıw, transport logistikası baǵdarında júzege kelip atırǵan qıyın xalıqaralıq máselelerge itibar qaratıp, bul Oraylıq Aziya regionı ushın áhmiyetli ekenin atap ótken. Qorǵanıw ministrleriniń ushırasıwı usı sıyaqlı máselelerdi sheshiwde de ashıq sóylesiwdi jolǵa qoyıw hám birgelikte jumıs alıp barıwda úlken áhmiyetke iye bolatuǵını atap ótilgen.
Ushırasıwda Oraylıq Aziya regionında qáwipsizlikti támiyinlew, mámleketleraralıq áskeriy hám áskeriy-texnikalıq birge islesiwdi rawajlandırıw jáne xalıqaralıq terrorizmge qarsı óz-ara birge islesiw qatnasıqların jańa basqıshqa kóteriw, paydalı baylanıslardı bunnan bılay da rawajlandırıw máseleleri boyınsha óz-ara pikir alısıldı. Usı jaǵınan bul ushırasıw nátiyjeleri kóp tárepleme áskeriy birge islesiwdi rawajlandırıw menen birge, zamanagóy sharayatlarda áskerlerdiń óz-ara tájiriybe almasıwında da úlken áhmiyetke iye bolatuǵını tábiyǵıy.
Ózbekstan keyingi segiz jılda xalıqaralıq áskeriy birge islesiw baǵdarında úlken jetiskenliklerge erisip, kóplegen mámleketler menen áskeriy hám áskeriy-texnikalıq baǵdarlarda bir qatar kelisimler, zamanagóy bilim hám tájiriybe almasıw, áskeriy taraw boyınsha sheriklikti pútkilley keńeytiw, birgelikte áskeriy oqıwlardı ótkeriw, regionallıq qáwipsizlikti támiyinlew baǵdarında bir qatar kelisimlerge eriskenin atap ótiw kerek.
Ushırasıw juwmaǵında Ózbekstan Respublikası qorǵanıw ministri, general-leytenant Shuhrat Xolmuhamedov tárepinen Oraylıq Aziya mámleketleri qorǵanıw ministrleriniń birinshi ushırasıwı protokolına qol qoyıldı.
Ilaj sheńberinde Ózbekstan Respublikası qorǵanıw ministri, general-leytenant Shuhrat Xolmuhamedov Qazaqstan, Tájikstan, Túrkmenstan hám Qırǵız Respublikası qorǵanıw ministrleri menen eki tárepleme ushırasıwlar ótkerdi.
Sóylesiwler waqtında áskeriy birge islesiwdi keńeytiw, birgeliktegi tayarlıq sistemasın jetilistiriw, tájiriybe hám ámeliy bilim almasıwdı jolǵa qoyıw, sonday-aq, regionallıq qáwipsizlik tarawındaǵı birgeliktegi baslamalardı ámelge asırıw máseleleri dodalandı. Tárepler mámleketleraralıq áskeriy hám áskeriy-texnikalıq birge islesiwdi rawajlandırıw, xalıqaralıq terrorizmge qarsı gúresiwde óz-ara awızbirshilikti kúsheytiw, regionallıq qáwipsizlikti támiyinlew jáne mámleketler arasında isenimli hám turaqlı birge islesiw ortalıǵın bekkemlew máselelerinde kelisimlerge eristi.
Ushırasıw qatnasıwshıları ushın Samarqand qalasındaǵı tariyxıy-mádeniy estelikler, dıqqatqa ılayıq orınlar boylap sayaxat shólkemlestirildi.
21-oktyabr kúni Oraylıq áskeriy okrug “Kattaqorǵan” poligonında Ózbekstan, Qazaqstan, Tájikstan, Qırǵızstan hám Ázerbayjan qorǵanıw ministrlikleri bólimleriniń qatnasıwında “Birlik – 2025” regionallıq oqıw shınıǵıwları ótkeriliwi rejelestirilgen.

Ǵolib Hasanov,
Alisher Isroilov (súwret),
ÓzAnıń xabarshıları