Bas prokuratura janındaǵı májbúriy orınlaw byurosı Qaraqalpaqstan Respublikası basqarması inspektorları tárepinen turaqlı túrde ilajlar ótkerilmekte.

Byuronıń Qaraqalpaqstan Respublikası izlew sektorı tárepinen ótkerilgen operativ-izlew ilajlarınıń birinde uzaq waqıttan berli aliment tólemey qashıp júrgen shaxs uslandı. MOB Nókis qalalıq bólimi is júrgiziwinde bolǵan, puqaralıq isleri boyınsha Nókis rayonlararalıq sudınıń qararına bola, puqara Yu.T.dan onıń burınǵı ómirlik joldasınıń paydasına aliment óndiriw belgilengen. Biraq qarızdar bir neshe márte eskertiwge qaramastan perzentleriniń materiallıq támiynatınan bas tartıp keledi.
Nátiyjede qarız muǵdarı 75 million sumnan asıp ketedi. Qarızdar áke qashıp júrsem tólemeymen, degen oy menen jasırınıp júredi. Júzege kelgen qarızdarlıqtı óndiriw maqsetinde onıń jasaw mánziline bir neshe márte barılǵanda qarızdar bul mánzilde jasamay atırǵanı anıqlanadı. Qarızdarǵa mámleketlik orınlawshı tárepinen izlew járiyalanǵan.
Alıp barılǵan operativ háreketler dawamında qarızdar Nókis qalasındaǵı xudojnikler ustaxanasında jumısshı bolıp islep atırǵanı anıqlanıp, uslandı.
Usınday jergilikli izlewge berilgen qarızdarlardı tabıw boyınsha tiyisli huqıq qorǵaw uyımları menen birgelikte ilajlar ámelge asırılmaqta.

Qaraqalpaqstan xabar agentligi.