Ózbekstan Respublikası investiciyalar, sanaat hám sawda ministriniń orınbasarı Ilzat Qosimov Qıtay Xalıq Respublikası Cyansu provinciyası Xalıqaralıq sawdanı rawajlandırıw keńesiniń bas direktorı Van Shanxua menen ushırasıw ótkerdi.

Sóylesiw waqtında ámeldegi baylanıslardı keńeytiw, jańa óndirislik kárxanaların shólkemlestiriw, sanlı infrastrukturanı rawajlandırıw máseleleri dodalandı. Sonıń ishinde, usı provinciya kárxanalarınıń qatnasıwında respublikamızda arnawlı sanaat zonasın shólkemlestiriw, sheriklikke qızıǵıwshılıq bildirgen Qıtay kompaniyalarınıń dizimin qáliplestiriw, birgeliktegi jumısshı topardı dúziw hám investiciyalıq ushırasıwlardı turaqlı ótkeriw rejesi kórip shıǵıldı.
Sonday-aq, kelesi jılı “road show” ilajların shólkemlestiriw arqalı óz-ara investiciya imkaniyatın úgit-násiyatlawǵa kelisip alındı.
Juwmaǵında tárepler imkaniyatlardan nátiyjeli paydalanıw hám birgeliktegi joybarlardı ámelge asırıw arqalı ekonomikalıq birge islesiwdi bekkemlewge tayar ekenin bildirdi.

M.Pirmatova, ÓzA