Ózbekstan Respublikasınıń «Mámleketlik til haqqında»ǵı Nızamı qabıl etilgeniniń 36 jıllıǵı múnásibeti menen Ájiniyaz atındaǵı Nókis mámleketlik pedagogikalıq institutında «Til bilimi hám lingvodidaktikanıń áhmiyetli máseleleri» atamasındaǵı respublikalıq ilimiy-ámeliy konferenciya hám bayram koncerti shólkemlestirildi.

Konferenciyanıń ashılıw plenar májilisinde jaslar máseleleri hám ruwxıy-aǵartıwshılıq isleri boyınsha birinshi prorektor Q.Qodirov sózge shıǵıp, qatnasıwshılardı bayram menen qutlıqladı.
Ilajda filolog ilimpazlar, professor-oqıtıwshılar, jas izleniwshiler, student-jaslar, keń jámiyetshilik hám ǵalaba xabar qurallarınıń wákilleri qatnastı.
Konferenciyada instituttıń qaraqalpaq tili kafedrasınıń professorı A.Pirniyazova, ózbek tili kafedrasınıń docenti A.Sultanova, usı kafedra doktorantı A.Kamalov ózbek tiliniń dúnya tilleri arasındaǵı ornı, túrkiy tillerdi izertlew máseleleri hám lingvistikanıń túrli tarawlarına baylanıslı bayanatların oqıp berdi. Atap ótilgenindey, bunnan 36 jıl burın, yaǵnıy 1989-jılı 21-oktyabr kúni Ózbekstan Respublikasınıń «Mámleketlik til haqqında»ǵı Nızamı qabıl etilip, ózbek tiline mámleketlik til biyligi berilgen edi.
Ózbekstan Respublikası Prezidenti Shavkat Mirziyoevtiń xalqımızǵa bayram qutlıqlawında keltirip ótkenindey, sońǵı jıllarda elimizde ózbek tilin rawajlandırıw, onıń turmısımızdaǵı ornı hám tásirin arttırıw boyınsha jańa basqısh baslandı. Mámleketlik tildiń abıroyı hám mártebesin arttırıwǵa baǵdarlanǵan párman hám qararlar, normativlik hújjetler qabıl etildi. Bul baǵdarda 2020-2030-jıllarǵa mólsherlengen koncepciya hám ayrıqsha baǵdarlama turmısqa engizilmekte.
Konferenciyada bayanatshılar hám sózge shıǵıwshılar tárepinen ózbek tiliniń dúnya tilleri arasındaǵı abıroyın arttırıw, elimizde mámleketlik til sıpatındaǵı mártebesin, qollanılıwın bunnan bılay da jetilistiriw, filologiya baǵdarında jańa baǵdarlarda ilimiy-izertlew jumısların alıp barıw maqsetinde aldaǵı waqıtlarda ámelge asırılatuǵın jumıslar haqqında da pikirler bildirildi.

Ilaj instituttıń «Tumaris» xalıq ansambli, «Sıy perde» hám «Tarannum» ansamblleri aǵzaları, Filologiya fakultetiniń qábiletli studentleri, sonday-aq, birge islesiwshil mektep oqıwshıları atqarıwındaǵı bayram koncerti menen dawam etti.
Qaraqalpaqstan xabar agentligi.