Jenevada Parlamentleraralıq Awqamnıń 151-assambleyası bolıp ótpekte. Onda Ózbekstan Senatınıń Baslıǵı Tanzila Norboeva qatnaspaqta.

– Assambleya sheńberinde parlament hayal-qızları forumında qatnastıq, – dedi T.Norboeva. – “Awızbirshilik hám ilham: hayal-qızlardı óz jolında qollap-quwatlaw” atamasında global áhmiyetke iye máseleler dodalandı. Barlıq qatnasıwshılar Tashkentte jıldıń basında bolıp ótken Parlamentleraralıq awqamnıń 150-yubiley assambleyasınıń joqarı dárejede shólkemlestirilgenin ayrıqsha atap ótip, usı ánjuman sheńberinde ótkerilgen hayal-qızlar forumınıń ózine tán ornı hám qabıl etilgen Tashkent deklaraciyasınıń tariyxıy áhmiyetin atap ótti.
Forumda hár bir hayaldıń hawazı, onıń ármanı hám global jámiyetshiliktiń tilekleslik ruwxı haqqında pikir júrgizildi. Usı mániste, Ózbekstanda hayal-qızlardıń potencialın júzege shıǵarıwǵa qaratılǵan kompleksli qatnastı alǵa qoyıp, parlamentleraralıq birge islesiwdi kúsheytiw, bilim hám jetekshilik imkaniyatların keńeytiw jáne daǵdarısta qalǵan hayal-qızlarǵa ámeliy járdem kórsetiwdi óz ishine alǵan baslamalar usınıldı.
Hayal-qızlardı qollap-quwatlaw hám olardıń jámiyettegi ornın bekkemlew – bul tek ǵana milliy máp emes, al insaniyattıń ulıwma rawajlanıwı hám tınıshlıqqa erisiw jolındaǵı strategiyalıq wazıypa bolıp esaplanadı.

ÓzA