Ózbekstan Respublikası Prezidentiniń 2021-jıl 9-avgust kúngi “Jetim balalar hám ata-ana qaramaǵınan ayrılǵan balalardı mámleket tárepinen qollap-quwatlawdıń jańa sistemasın engiziw ilajları haqqında” ǵı PQ-5216-sanlı qararına tiykarlanıp, baǵıwshısın joǵaltqan jaslarımız Miyirbek Reymov hám Elburs Qadirniyazovlarǵa rayondaǵı Esim mákan puqaralar jıyınında jaylasqan «Jańa Ózbekstan massivi»nde qurılǵan turaq jaydan barlıq qolaylıqlarǵa iye eki xanalı úy sawǵa etildi.

Ilajda rayon hákimi A. Baymuratov tiyisli taraw basshıları menen birge turaq jay iyelerine jańa úydiń giltin tapsırıp, olarǵa jaqsı tileklerin bildirdi hám ondaǵı jaratılǵan sharayatlar menen tanıstı.
-Rayonımız boyınsha Prezidentimizdiń PQ-5216-sanlı qararı tiykarında bıyılǵı jılı 4 jasqa jańa úylerdi sawǵa etiw rejelestirilgen, – deydi Qaraózek rayonlıq Insan sociallıq xızmetler orayınıń balalardı sociallıq qorǵaw sektorınıń baslıǵı Azamat Dáribaev. – Sonnan búgin Esim hám Ata mákan elatlarında jasawshı eki jasqa jańa Ózbekstan massivinen eki úy satıp alıp berdik. Sonday-aq, Elburs Qadirniyazov Sociallıq qorǵaw milliy agentligi tárepinen Prezidentimizdiń arnawlı qararı tiykarında mámleketlik jeńillik penen grant boyınsha oqıwǵa qabıllandı. Bunday iygilikli isler rayonımızda ele dawam etpekte.
Ilajda jańa úy iyeleri de Prezidentimizdiń jaslarǵa jaratıp atırǵan imkaniyatlarına kewilleri tolıp, Jurtbasshımızǵa ózleriniń minnetdarshılıqların bildirdi.

Adilbay Orazov,
Qaraqalpaqstan xabar agentligi sholıwshısı.