Saudiya Arabstanındaǵı SPA málimleme agentligi, “Al-Riyadh”, “Al-yaum”, “Akhbaar-24” sıyaqlı jetekshi basılımlar Patshalıq investiciyalar ministri Xolid Al-Falih basshılıǵındaǵı delegaciyanıń mámleketimizge saparın keńnen jarıtpaqta.

Maqalalarda Prezidentimizdiń usı qúdiretli arab mámleketiniń jetekshi kompaniyalarınıń basshıları menen ushırasıwı tolıq tallanbaqta. Mámleketimiz basshısı atap ótkenindey, eki mámleket jetekshileriniń birgeliktegi háreketleri sebepli keyingi jıllarda Ózbekstan – Saudiya kóp táreplemeli sherikligi joqarı dárejege kóterildi.
– Ullı mártebeli mırza – Ózbekstan Respublikası Prezidenti Shavkat Mirziyoevtiń basshılıǵında ótkerilgen dógerek sáwbetinde hár eki táreptiń umtılısınan kelip shıqqan halda, mámleketlerimizdiń ekonomikasın bunnan bılay da bekkemlew, xalıqlarımızdıń abadanlıǵın arttırıw máseleleri dodalandı, – delingen maqalada. – Óz-ara paydalı birge islesiwde nátiyjelilikti támiyinlew jolları tallandı. Saudiya – Ózbekstan qospa komitetiniń jetinshi májilisi bolıp ótti. Ushırasıwda hár qıylı áhmiyetli tarawlardaǵı sheriklikti rawajlandırıwǵa baylanıslı bir qatar máseleler, atap aytqanda, perspektivalı investiciyalıq imkaniyatlar kórip shıǵıldı, isbilermenlik ortalıǵı aldında turǵan mashqalalardıń sheshimine ayrıqsha itibar qaratıldı.
Ilajǵa “ACWAPower”, “Al Muhaidib Group”, “Vision Invest”, “Data Volt”, “Riyadh Cables”, “AlMajdiah”, “InterHealth”, “Saudi Tabreed”, “Al-Bawani Holding”, “Miahona”, “Pemco” sıyaqlı belgili kompaniya hám korporaciyalardıń wákilleri qatnasqanı atap ótilgen.
– Saudiya hám Ózbekstan qatnasıqlarındaǵı búgingi jedel rawajlanıwǵa tiykarǵı tarmaqlardıń juwapkerleri arasında saparlar almasıwı, birliktegi húkimet komitetleri, isbilermenler keńesiniń májilisleri, forumlar arqalı erisilmekte, – dep juwmaq shıǵarǵan avtor.

M.Pirmatova, ÓzA