Varshavada Evropada qáwipsizlik hám birge islesiw shólkeminiń (EQBSh) Demokratiyalıq institutlar hám insan huqıqları boyınsha byurosı tárepinen Insanıylıq normaları boyınsha Varshava konferenciyası bolıp ótti.

Oǵan Ózbekstan delegaciyası da qatnastı. Ánjuman sheńberinde “Gender teńlik perspektivaları: Ózbekstannıń hayal-qızlar huqıqları boyınsha global kún tártibine qosqan úlesi” atamasında ilaj shólkemlestirildi.
Ilajdı ótkeriwden gózlengen maqset – Ózbekstannıń hayal-qızlar huqıqların alǵa qoyıw hám gender teńlikti támiyinlew tarawındaǵı jetiskenliklerin tanıstırıw, sonday-aq, bul tarawdaǵı rawajlanıwdı jedellestiriw máseleleri boyınsha xalıqaralıq sóylesiwdi bekkemlewge járdemlesiwden ibarat.
Dodalawda 40 tan aslam qatnasıwshı, sonıń ishinde, EQBShǵa aǵza mámleketlerdiń diplomatiyalıq wákilxanaları, puqaralıq jámiyeti, xalıqaralıq shólkemler hám akademiyalıq institutlardıń wákilleri qatnastı.
Ilajda Oliy Majlis Senatınıń aǵzası G.Marufova, Insan huqıqları boyınsha Ózbekstan Respublikası Milliy orayı direktorınıń orınbasarı D.Murodova Ózbekstanda gender teńlikti támiyinlew baǵdarında islenip atırǵan jumıslar boyınsha maǵlıwmat berdi.
Parlamenttiń hayal-qızlar huqıqların alǵa qoyıw boyınsha jedel platformaǵa aylanǵanı atap ótildi. 2030-jılǵa shekem mólsherlengen Gender teńlikke erisiw boyınsha milliy strategiyanıń bul baǵdardaǵı unamlı tásirine itibar qaratıldı.
Hayal-qızlardıń ekonomikalıq erkinligin támiyinlew ilajları, sonıń ishinde, jeńilletilgen kreditlew baǵdarlamaları hám bilimlendiriw baslamalarına ayrıqsha itibar berildi.
Dodalaw qatnasıwshıları mámleket basshısınıń joqarı siyasiy erk-ıqrarı hám keń kólemli nızamshılıq reformaları tiykarında Jańa Ózbekstanda gender teńlik tarawında sezilerli jetiskenliklerge erisilgenin atap ótti.

N.Abduraimova, ÓzA