Prezident Shavkat Mirziyoev kásiplik awqamları wákilleri menen ushırastı. Házirgi waqıtta mámleketimiz basshısı shıǵıp sóylep, taraw wákilleri menen sóylesip atır.

– Insannıń miyneti, onıń qádiri qanday biybaha baylıq ekenin sizler hámmeden jaqsı bilesiz, – dedi Prezident ushırasıwda.
Elimizde xalıqshıl, sociallıq mámleket qurıw, insan qádirin ulıǵlaw barlıq reformalarımızdıń baslı maqsetine aylanǵan házirgi kúnde olardıń bay bilim hám tájiriybesi oǵada áhmiyetli.
Pursattan paydalanıp, mámleketimiz basshısı hár bir kárxana hám shólkemge issheńlik ortalıǵın, miynet jámáátlerine xoshamet hám ádillik ruwxın alıp kirip atırǵan kásiplik awqamlarınıń belsendilerine shın júrekten minnetdarshılıq bildirdi.
Reformalardıń dáslepki kúnlerinen “Insan qádiri ushın” degen iygilikli ideyanı ámelge asırıw ushın, bárinen burın, ekonomikalıq-sociallıq tarawlardı rawajlandırıwǵa tiykarǵı itibar qaratıldı.
Bul joldaǵı háreketler sebepli segiz jılda ekonomikamızǵa 130 milliard dollar investiciya kirip keldi, mıńlaǵan jańa quwatlıqlar iske qosıldı, millionlaǵan turaqlı jumıs ornı jaratıldı.
Jeke menshik sektorǵa keńnen jol ashılıp, adamlarǵa múnásip miynet sharayatı jaratıp berilgeni sebepli jan basına dáramat 3,5 mıń dollarǵa jetti.

ÓzA