Ózbekstan Respublikası Prezidentiniń 2024-jıl 14-noyabrdegi «Balalardı sociallıq qorǵaw sistemasın bunnan bılay da jetilistiriw ilajları haqqında»ǵı pármanı, sonday-aq, Ministrler Kabinetiniń 2024-jıl 27-dekabrdegi «Jetim hám ata-ana qaramaǵınan ayırılǵan balalardı jaylastırıw formaları boyınsha ayırım normativlik-huqıqıy hújjetlerdi tastıyıqlaw haqqında»ǵı qararı hám Ózbekstan Respublikası Prezidenti janındaǵı Sociallıq qorǵaw milliy agentligi direktorınıń 2025-jıl 29-sentyabrdegi arnawlı buyrıǵına muwapıq, usı kúnge shekem jumıs alıp barıp atırǵan «Taqıyatas balalar úyi»niń jumısı rásmiy túrde toqtatıldı.
Bul qarar balalardı sociallıq qorǵaw sistemasın reformalaw, olardı shańaraqlıq ortalıqqa jaqın sharayatta tárbiyalaw hám hár bir tárbiyalanıwshınıń jeke rawajlanıwın támiyinlew maqsetinde qabıl etilgen, – deydi Sociallıq qorǵaw milliy agentligi Qaraqalpaqstan Respublikası basqarmasınıń baspasóz xatkeri Paraxat Qazaqbaev.
«Taqıyatas balalar úyi»nde tárbiyalanıp kelgen balalar belgilengen tártipte Nókis qalasında jańadan shólkemlestirilgen «Kishi kólemli balalar úyi»ne kóshirildi. Jańa mákemede balalar ushın zamanagóy bilimlendiriw, dem alıw hám jeke qábiletlerin rawajlandırıw ushın barlıq sharayatlar jaratılǵan.
Sonday-aq, olardı jańa ortalıqqa beyimlestiriw, ruwxıy hám sociallıq qollap-quwatlaw maqsetinde tájiriybeli sociallıq xızmetkerler, psixologlar hám tárbiyashılar jumıs alıp barmaqta.
Bul ózgerisler mámleketimizde jetim hám ata-ana qaramaǵınan ayırılǵan balalardı mámleketlik qorǵawǵa alıw sistemasın zamanagóy basqıshqa alıp shıǵıw jolındaǵı áhmiyetli ámeliy qádemlerden biri bolıp esaplanadı.

Á.Jiyemuratov,
Qaraqalpaqstan xabar agentligi.