Samarqand qalasında ǴMDAǵa aǵza mámleketler qáwipsizlik uyımları hám razvedka xızmetleri basshılarınıń 21-májilisi óz jumısın basladı.

Mámleketimizde birinshi márte ótkerilip atırǵan bul ilajda Ázerbayjan, Armeniya, Belarus, Qazaqstan, Qırǵızstan, Rossiya, Tájikstan, Túrkmenstan hám Ózbekstannıń qáwipsizlik uyımları hám razvedka xızmetleriniń basshıları qatnaspaqta.
Dáslep Ózbekstan Respublikası Prezidenti Shavkat Mirziyoevtiń májilis qatnasıwshılarına múrájatın Prezident janındaǵı qáwipsizlik keńesiniń xatkeri V.Mahmudov oqıp esittirdi.
Mámleketimiz basshısı óziniń múrájatında búgin dúnyada global geosiyasiy jaǵday qıyınlasıp, dástúriy shaqırıq hám qáwip-qáterler kúsheyip, jańaları payda bolıp atırǵan sharayatta doslıq awqamı mámleketleriniń xalıqaralıq hám regionallıq qáwipsizlik máseleleri boyınsha poziciyaların bekkemlew hár qashanǵıdan da zárúr ekenin atap ótken.
Ilajda qatnasıwshılar zamanagóy qáwip-qáterler boyınsha pikir alısıp, ǴMDA mámleketleri razvedka xızmetleri arasındaǵı birge islesiwdi bekkemlew boyınsha gezektegi wazıypalardı dodalaydı.
Ushırasıw juwmaǵında delegaciyalardıń basshıları regionallıq qáwipsizlikti támiyinlew boyınsha birge islesiwdiń anıq wazıypaları hám tiykarǵı baǵdarların belgilep alıwı názerde tutılǵan.

Ǵ. Hasanov,
A. Isroilov (súwret), ÓzA