Búgingi kúnde málimleme texnologiyaları hár bir mámlekettiń rawajlanıwınıń tiykarǵı súyenishine aylanıp barmaqta.
Sanlı ekonomikanı rawajlandırıw, innovaciyalıq ideyalardı ámelge asırıw hám jaslardıń potencialın qollap-quwatlaw tarawlarında xalıqaralıq birge islesiw úlken áhmiyetke iye. Usı maqsette, Ózbekstan hám Tájikstan IT tarawındaǵı qatnasıqlardı bekkemlewge ayrıqsha itibar qaratpaqta.

Sanlı texnologiyalar ministri Sherzod Shermatovtiń Dushanbe qalasına ámelge asırǵan saparı sheńberinde Tájikstan paytaxtında jaylasqan «IT-Park Dushanbe» jumısı menen jaqınnan tanısıw bolıp ótti.
Ushırasıw waqtında delegaciyaǵa usı parktiń shólkemlestiriliw tariyxı, onıń tiykarǵı baǵdarları, rezident-kompaniyalar ushın jaratılǵan sharayatlar hám Tájikstanda málimleme texnologiyaları tarawın rawajlandırıw boyınsha ámelge asrılıp atırǵan reformalar haqqında maǵlıwmat berildi.
Sonday-aq, IT-Park aymaǵında jaslar hám startap joybarlardı qollap-quwatlaw, málimleme texnologiyaları tarawında maman qánigeler tayarlaw, innovaciyalıq sheshimlerdi engiziw hám jeke menshik sektor menen birge islesiwdi keńeytiw baǵdarındaǵı jumıslar tanıstırıldı.
Sapar sheńberinde Ózbekstan hám Tájikstan IT-Parkleri arasında birge islesiwdi jedellestiriw, birgelikte startap hám inkubaciya baǵdarlamaların shólkemlestiriw, sonday-aq, IT-kompaniyalardıń jumısı ushın qolaylı ortalıq jaratıw máseleleri dodalandı.
Ushırasıw juwmaqlarına bola, tárepler málimleme texnologiyaları tarawında qospa joybarlardı ámelge asırıw, tájiriybe almasıw hám IT-Parkler arasında turaqlı birge islesiw platformasın jolǵa qoyıw boyınsha kelisimge eristi.

Nigora Rahmonova, ÓzA