Ájiniyaz atındaǵı Nókis mámleketlik pedagogikalıq institutında bolıp ótken seminarda Ózbekstan Respublikası Prezidenti Administraciyası janındaǵı Narkotiklerdi qadaǵalaw milliy orayı, Ishki isler ministrligi, Qaraqalpaqstan Respublikası Mektepke shekemgi hám mektep bilimlendiriwi ministrligi, Respublikalıq oqıwshılardı kásip-ónerge baǵdarlaw hám psixologiyalıq-pedagogikalıq diagnoz orayı, Respublikalıq qánigelestirilgen ruwxıy salamatlıq ilimiy-ámeliy medicinalıq orayı Qaraqalpaqstan Respublikası filialı wákilleri tárepinen jaslarǵa náshebentlik hám psixotrop zatlardıń zıyanlı aqıbeti haqqında keń túrde túsinik berildi.

Atap ótilgenindey, elimiz boylap náshebentlik hám narkojınayatlarǵa qarsı gúresiw boyınsha milliy strategiya islep shıǵılǵan bolıp, orınlarda hár qıylı úgit-násiyat ilajları ámelge asırılmaqta.
Ilajda náshebentlik hám psixotrop zatlar mashqalası búgingi kúnniń eń global hám aktual mashqalalarınıń biri ekenligi atap ótildi. Ásirese, jaslar arasında bul illetlerdiń tarqalıwı jámiyetimiz ushın úlken qáwip tuwdıradı.
Seminarda sózge shıqqanlar tárepinen bul mashqalanıń aldın alıw hám jaslardı usınday zıyanlı illetlerden saqlap qalıw ushın túsindiriw jáne úgit-násiyat jumıslarınıń nátiyjeliligin arttırıwdıń áhmiyeti joqarı ekenligi ayrıqsha tilge alındı.
Náshebentlik hám psixotrop zatlardan paydalanıw tek ǵana insannıń fizikalıq salamatlıǵına keri tásirin tiygizip qoymastan, ruwxıy salamatlıǵı hám jámiyetlik turmısında da ornı tolmas joǵaltıwlarǵa alıp keledi. Náshebentlik ádetlerine berilgen jaslar oqıw, jumıs hám jeke turmısında joqarı nátiyjelerge erise almaydı, shańaraq aǵzaları hám dosları menen qarım-qatnasında mashqalalar júz berip, sociallıq izolyaciyaǵa túsip qaladı.
Bunıń aldın alıw ushın jaslar arasında turaqlı túrde ruwxıy-aǵartıwshılıq úgit-násiyat jumısların shólkemlestirip, jaslarǵa salamat turmıs tárizi hám náshebentlikten awlaq bolıw usılları haqqında maǵlıwmatlar berip barıw áhmiyetli esaplanadı.
Sonıń menen birge, shańaraq hám jámiyettiń rolin arttırıw, nızamshılıq hám jámiyetlik qadaǵalawdı kúsheytiw, jaslar ushın psixologiyalıq járdem kórsetiw hám reabilitaciyalıq jumıslardı jolǵa qoyıw náshebentlik hám psixotrop zatlardıń jaslar arasında tarqalıwınıń aldın alıwǵa xızmet etedi.
Seminar dawamında qatnasıwshılar ózlerin qızıqtırǵan sorawlarǵa qánigelerden tolıq juwap aldı.

Qaraqalpaqstan xabar agentligi