15-oktyabr – Xalıqaralıq awıl hayalları kúni múnásibeti menen Nókis qalasındaǵı payızlı orınlardıń birinde Qaraqalpaqstan Respublikası Awıl xojalıǵı ministrligi tárepinen saltanatlı bayram ilajı ótkerildi.

Maqset – awıl xojalıǵı tarawında pidákerlik penen miynet etip atırǵan hayal-qızlardıń jámiyetimizdegi ornı, olardıń agrar tarawdı rawajlandırıwǵa qosıp atırǵan úlken úlesin málim etiw hám olardı xoshametlewden ibarat.
Ilajda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı, Awıl xojalıǵı ministri Sh.Teshaev, sonday-aq, Qaraqalpaqstan Respublikası Joqarǵı Keńesiniń awıl hám suw xojalıǵı máseleleri boyınsha sekretariat baslıǵı A.Jumaniyazovlar qatnasıp, barlıq jıynalǵanlardı bayram menen qutlıqladı.
Ilaj dawamında awıl xojalıǵı tarawında nátiyjeli miynet etip kiyatırǵan bir topar hayal-qızlar húrmet jarlıqlar hám estelik sawǵaları menen sıylıqlandı. Bayram baǵdarlaması mádeniyat xızmetkerleri tárepinen tayarlanǵan koncert baǵdarlaması menen dawam etti.
Maǵlıwmat ushın, búgingi kúnde Qaraqalpaqstanda jámi 511 hayal fermer xojalıǵın basqarıp kelmekte. Olardıń 300 den aslamı diyqanshılıq, 58 i sharwashılıq hám balıqshılıq, 150 den aslamı baǵshılıq hám pal hárreshilik penen shuǵıllanıp kelmekte. Tiykarǵısı, fermer hayal-qızlar óziniń nátiyjeli miyneti menen elimizdiń ekonomikasınıń rawajlanıwına múnásip úles qospaqta.

Qaraqalpaqstan xabar agentligi