ÓzLiDePten saylanǵan xalıq deputatları Beruniy rayonlıq Keńesiniń aǵzaları 2025-jıldıń úshinshi shereginde ámelge asırǵan jumısları boyınsha saylawshılar aldında esap bermekte. Atap aytqanda, 21-Berdaq saylaw okruginen saylanǵan deputat R.Yuldasheva Nawayı mákan puqaralar jıyınında ushırasıw ótkerip, jumısları boyınsha xalıqqa esap berdi.

Ushırasıw dawamında máhállede jasawshı puqara tárepinen bildirilgen turaq jay mashqalası deputat tárepinen qadaǵalawǵa alınıp, tiyisli shólkemlerge jiberildi.
Sonday-aq, 1-Ó.Jumaniyazov saylaw okruginen saylanǵan deputat L.Xojaniyazova da Sarkop mákan puqaralar jıyınında óz saylawshıları menen ushırasıp, sherek juwmaǵı boyınsha esabatın berdi. Májiliste juwapker uyımlar, “Máhálle jetiligi,” xalıq wákilleri hám ǴXQ qatnastı.
Saylawshılar tárepinen deputatqa 6 múrájat kelip tústi. Olardıń birewi óz ornında sheshildi, birewi boyınsha huqıqıy túsinik berildi, Al, 4 múrájat boyınsha deputat sorawı tiykarında tiyisli shólkemlerge jiberildi.
Múrájatlar tiykarınan “Ijodkor,” “Temirshi” hám “Fazo” kóshelerine ЩPS tósew, 7-mikroaymaqta mektep hám baqsha qurılısı, 6-mikroaymaqta tábiyǵıy gaz tarmaqlarınıń kesiliwine baylanıslı máselelerdi qamtıp aldı. Bul mashqalalardı saplastırıw maqsetinde deputatlıq sorawlar jiberilip, juwaplar saylawshılarǵa jetkeriletuǵını belgilendi.

Qaraqalpaqstan xabar agentligi