2025-jıldıń 16-17-oktyabr kúnleri Samarqand qalasında Ǵárezsiz Mámleketlerdiń Doslıq Awqamına aǵza mámleketlerdiń qáwipsizlik uyımları hám arnawlı xızmetleri basshıları Keńesiniń 57-májilisi óz jumısın basladı. Bıyılǵı ilaj Ózbekstan Respublikası Mámleketlik qáwipsizlik xızmeti tárepinen shólkemlestirildi.

Ánjuman aldında Ózbekstan Respublikası Prezidenti Shavkat Mirziyoevtiń májilis qatnasıwshılarına qutlıqlaw sózi oqıp esittirildi.
Onda atap ótilgenindey, bul Keńestiń hár jılǵı májilisleri terrorizm, ekstremizm, narkotrafik, shólkemlesken jınayatshılıq hám basqa da zamanagóy qáwip-qáterlerge qarsı gúresiwde birge islesiw hám tájiriybe almasıw ushın bekkem tiykar jarattı.
Mámleketimiz basshısı Oraylıq Aziya regionında qáwipsizlikke qáwip tuwdırıp atırǵan bir qatar faktorlarǵa ayrıqsha itibar qarattı.
Awǵanstandaǵı turaqsız jaǵday, xalıqaralıq terroristlik toparlardıń jumısı, náshebentlik zatlardıń nızamsız aylanısı hám transshegaralıq shólkemlesken jınayatshılıq usılardıń qatarına kiretuǵını kórsetip ótildi.
Sonıń menen birge, kiberjınayatshılıqqa qarsı gúresiw hám jasalma intellektten ǵárezli maqsetlerde paydalanıwdıń aldın alıw boyınsha birge islesiwdi bekkemlew áhmiyetli ekenligi atap ótildi.
Prezident global qáwipsizlik máselesine ayrıqsha toqtap ótip, region átirapı hám Jaqın Shıǵısta júz berip atırǵan kelispewshilikler hámmeni tereń táshwishke salıp atırǵanı, olar ekonomikalıq hám azıq-awqat qáwipsizligine unamsız tásir kórsetip atırǵanın atap ótti.
Bul faktorlar jáhán bazarında salamat emes básekiniń kúsheyiwi, energiya derekleriniń bahasınıń artıwına alıp kelmekte. Sonday-aq, energetika hám transport tarawlarında milliy hám xalıqaralıq joybarlardı ámelge asırıwǵa tosqınlıq etpekte.
Ózbekstan Prezidenti usınday qıyın sharayatta ǴMDAǵa aǵza mámleketlerdiń arnawlı xızmetleri arasındaǵı ámeliy birge islesiwdi bunnan bılay da tereńlestiriw, ekonomikalıq, energetika hám kommunikaciya sistemaların turaqlı rawajlandırıw jáne azıq-awqat qáwipsizligin támiyinlewde olardıń háreketlerin birlestiriw áhmiyetli ekenligin ayrıqsha atap ótti.

ÓzA