Ózbekstan Respublikası Ilimler akademiyası Qaraqalpaqstan bóliminde Qıtay Xalıq Respublikasınıń Sinczyan awıl xojalıǵı ilimleri akademiyasınıń ilimpazlarınan ibarat delegaciya qatnasıwında ushırasıw bolıp ótti.

Ilajda Ózbekstan Respublikası Ilimler akademiyası Qaraqalpaqstan bóliminiń baslıǵı, akademik Axmed Reymov miymanlardı jıllı júzlilik penen kútip alıp, mámleketimizde, atap aytqanda, Qaraqalpaqstan Respublikasında awıl xojalıǵı tarawında ámelge asırılıp atırǵan reformalar, jer ónimdarlıǵın arttırıw, ekologiyalıq turaqlılıqtı támiyinlew hám suw resurslarınan aqılǵa uǵras paydalanıw baǵdarındaǵı jumıslar haqqında tolıq maǵlıwmat berdi.
Sáwbetlesiw barısında tárepler óz-ara tájiriybe almasıw, shorlanǵan jerlerde topıraq quramın jaqsılaw, qumlardıń kóshiwiniń aldın alıw hám aymaqlarda turaqlı diyqanshılıqtı rawajlandırıw baǵdarlarında birgelikte ilimiy-ámeliy izertlewler alıp barıw boyınsha kelisip aldı. Sonday-aq, delegaciya aǵzaları tárepinen Qıtaydıń aldınǵı agrotexnologiyaların Qaraqalpaqstan sharayatına beyimlestiriw, ósimlik genetikası hám selekciya tarawlarında birge islesiwdi rawajlandırıw boyınsha usınıslar bildirildi.
Ushırasıw juwmaǵında tárepler eki tárepleme ilimiy baylanıslardı jáne de bekkemlew, birgeliktegi joybar hám baǵdarlamalardı ámelge asırıw, sonday-aq, jas ilimpazlar hám izertlewshiler arasında tájiriybe almasıw baǵdarlamaların jolǵa qoyıw boyınsha óz-ara pikir alıstı.
Ótkerilgen bul ushırasıw Ózbekstan hám Qıtay arasındaǵı ilimiy-innovaciyalıq birge islesiwdi bunnan bılay da bekkemlew, aymaqtıń ekologiyalıq hám agrar mashqalaların birgelikte sheshiwde jańa perspektivalardı ashıp berdi.

Adilbay Orazov,
Qaraqalpaqstan xabar agentligi sholıwshısı.