Búgingi kúnde sanlı transformaciya hár bir mámlekettiń rawajlanıwında sheshiwshi faktorǵa aylanbaqta. Málimleme texnologiyaların engiziw tek ǵana mámleketlik xızmetlerdi nátiyjeli shólkemlestiriw emes, al ekonomikanıń barlıq tarawlarında ashıq-aydınlıq hám operativlikti támiyinlewde úlken áhmiyetke iye bolmaqta.

Usı maqsette Sanlı texnologiyalar ministri Sherzod Shermatov Dushanbe qalasına saparı sheńberinde Tájikstan Respublikası Prezidenti janındaǵı Innovaciyalar hám sanlı texnologiyalar agentligi direktorı Xurshed Mirzo menen ushırasıw ótkerdi.
Sapar dawamında Agentlik basshısı tárepinen miymanlarǵa mámlekette sanlı ekonomikanı rawajlandırıw, mámleketlik xızmetlerdi elektron formatqa ótkeriw, maǵlıwmatlar almasıw sistemaların jaratıw hám málimleme qáwipsizligin támiyinlew baǵdarında ámelge asırılıp atırǵan jumıslar haqqında tolıq maǵlıwmat berildi. Sonday-aq, Tájikstanda islep shıǵılǵan sanlı sheshimler, platforma hám innovaciyalıq baǵdarlamalar boyınsha prezentaciya ótkerilip, olardıń ámeldegi nátiyjeleri kórsetildi.
Ushırasıw dawamında Ózbekstan hám Tájikstan arasında sanlastırıw tarawındaǵı birge islesiwdi jáne de keńeytiw, birgeliktegi joybarlardı ámelge asırıw hám eki mámlekettiń sanlı ekosistemaların úylestiriw máseleleri dodalandı.
Sonıń ishinde, mámleketlik uyımlardıń málimleme sistemaları arasında óz-ara integraciyanı kúsheytiw, bajıxana maǵlıwmatların sanlı formatta almasıw, maǵlıwmatlardı jedel hám qáwipsiz uzatıw sistemasın jolǵa qoyıw boyınsha usınıslar alǵa qoyıldı.

Nigora Rahmonova, ÓzA