Prezident Shavkat Mirziyoev 15-oktyabr kúni Tashkent wálayatında jańa xalıqaralıq aeroport joybarınıń prezentaciyası menen tanıstı hám bul úlken kompleks qurılısınıń baslanıwına baǵıshlanǵan máresimde qatnastı.
Izbe-iz rawajlanıp, úlken megapoliske aylanıp atırǵan Tashkent qalasına dúnyanıń túrli regionlarınan sayaxatshılar hám isbilermenler, investorlar hám mámleketlik ǵayratkerlerdiń keliwi kóbeyip barmaqta. Anıq sanlar menen aytatuǵın bolsaq, Ózbekstan dúnyaǵa keńnen ashılǵanınan soń sırt el sayaxatshılarınıń sanı 3 millionnan 10 millionǵa arttı. 2030-jılǵa barıp, 15 millionǵa jetedi.
Jaqsı qońsıshılıq baylanıslarınıń tiklengeni, shegaralardıń ashılǵanı nátiyjesinde adamlar ushın regionımız boylap biymálel háreketleniw imkaniyatı jaratıldı.
Mámleketimiz basshısınıń baslaması menen qurılıp atırǵan Jańa Tashkent qalası da qolaylı jaylasıwı, investiciyalıq tartımlılıǵı, jasaw ushın barlıq sharayatqa iye bolǵanı sebepli, oǵada xalıq kóp jıynalatuǵın orınlardan biri bolıwı kútilmekte.
Soǵan muwapıq, transport infrastrukturasınıń barlıq baǵdarları teń salmaqlı rawajlandırılmaqta. Ásirese, aviaciya tarawında jańa ekosistemanı qáliplestiriw boyınsha keń kólemli jumıslar alıp barılmaqta.
Atap aytqanda, aymaqlardaǵı 7 xalıqaralıq aeroport zaman talapları tiykarında rekonstrukciyalanbaqta.
Moynaq, Qoqand, Zamin, Shahrisabz, Sariosiyo, Swx rayonlarında jańa aeroportlar qurılıp, olardıń sanı 18 ge jetkerildi.
Eń áhmiyetlisi, tarawda báseki ortalıǵı jaratılǵanı sebepli 15 jańa aviakompaniya payda boldı. Olardıń aviaparkindegi hawa kemeleriniń sanı 26 dan 105 ke jetti.
Házirgi waqıtta Saudiya Arabstanı, Birlesken Arab Ámirlikleri, Qatar, Koreya, Qıtay, Hindstan, Malayziya, Túrkiya, Rossiya, Polsha sıyaqlı mámleketlerdiń 51 aviakompaniyası Ózbekstanǵa turaqlı qatnawlardı ámelge asırmaqta.
Mámleketimiz basshısı óziniń shıǵıp sóylegen sózinde keleshekte de transport infrastrukturası jedel rawajlandırılatuǵının atap ótti.
Sonıń ishinde, kelesi bes jılda aviaparktegi hawa kemeleri 180, jónelisler 230 ǵa, jergilikli hám xalıqaralıq aviaqatnawlar sanı bolsa jılına 200 mıńǵa jetkeriledi. Aeroport infrastrukturasın jeke menshik sheriklik tiykarında rawajlandırıw boyınsha ilajlar izbe-iz dawam ettiriledi.
– Bul reformalarımızdıń sońǵı nátiyjesinde Ózbekstandı Shıǵıs hám Batıs, Qubla hám Arqanı baylanıstıratuǵın iri aviaciya xabına aylandırıwdı maqset etkenbiz, – dedi Shavkat Mirziyoev.
Jańa xalıqaralıq aeroporttıń qurılısı oǵan úlken tiykar bolatuǵını atap ótildi.
Tallawlarǵa bola, sońǵı segiz jılda paytaxtqa aviajolawshılar aǵımı úsh esege artıp, jılına 9 millionǵa jetti. 2040-jılǵa barıp, 24 millionnan asadı. Biraq jılına 11 million adamǵa xızmet kórsetetuǵın házirgi aeroport qala aymaǵında jaylasqanı ushın onı keńeytiw imkaniyatı joq. Sol sebepli, tarawdaǵı jetekshi sırt elli ekspertler hám jámiyetshilik wákilleri menen talqılap, Orta Shırshıq hám Tómengi Shırshıq rayonlarındaǵı 1 mıń 300 gektar maydanda jańa xalıqaralıq aeroport qurılmaqta.
Saudiya Arabstanınıń “Vision Invest”, Yaponiyanıń “Sojitz” hám Koreyanıń “Incheon” kompaniyalarınıń qatnasıwındaǵı xalıqaralıq konsorcium menen birgelikte ámelge asırılatuǵın joybar tórt basqıshtan ibarat bolıp, birinshi basqıshta 2,5 milliard dollar esabınan aerovokzal hám aerodrom qurıladı. Bul arqalı terminallar arqalı jılına 20 million jolawshı hám 129 mıń tonna júk ótkeriw, saatına 30 ushıw-qonıw operaciyasın orınlaw, 14 teleskoplıq traplardan paydalanıw hám bir waqıttıń ózinde 62 hawa kemesin saqlaw imkaniyatı jaratıladı.
Bul aeroport aviaciya xızmetleriniń sapasın arttırıw, párwazlardıń qáwipsizligin támiyinlew, texnikalıq jaqtan tártipke salıw boyınsha Xalıqaralıq puqaralıq aviaciyası shólkeminiń talaplarına tolıq juwap beredi.
Eń aldınǵı aeronavigaciya hám párwazlar qáwipsizligin támiyinlew sistemaları ornatılıp, hár qanday hawa-rayı sharayatında samolyotlardı qabıl etiw múmkin boladı.
Jáne bir áhmiyetli tárepi, bul joybar “jasıl” standart principlerine juwap beretuǵın regiondaǵı birinshi aeroport boladı. Terminalda 46 mıń kvadrat metrlik “Duty free” zonası shólkemlestiriledi.
Jańa aeroporttı qurıw arqalı multimodal transport baylanısı shólkemlestiriledi. Bul aymaq Tashkent – Samarqand, Tashkent – Ándijan, Tashkent – Bostanlıq tólemli avtomobil jollarına jalǵanadı. Bul jerde zamanagóy temir jol stanciyası qurılıp, tezjúrer poezd qatnawı jolǵa qoyıladı. Paytaxt hám Jańa Tashkent orayları shattl transport xızmetleri arqalı baylanısadı.
Eń tiykarǵısı, jańa aeroport ekonomikalıq jaqtan da mámleket ushın tartımlı bolıp, bul joybar mámleketimizge 27 milliard dollardan aslam dáramat keltiredi. Elimizde xızmet kórsetiw, óndiris, turizm tarawlarınıń jáne de rawajlanıwına, jańa jumıs orınlarınıń ashılıwına úles qosadı.
Mámleketimiz basshısı ilajda qatnasıp atırǵan sırt elli birge islesiwshiler, qarjı shólkemleri, turistlik kompaniyalardıń wákillerine minnetdarshılıq bildirdi. Jańa aeroporttıń qurılısında qatnasatuǵın barlıq qánigeler, injenerler hám qurılıs toparına joqarı isenim bildirdi.
Prezidentimiz Shavkat Mirziyoev jańa Tashkent xalıqaralıq aeroportınıń tırnaǵına kapsula qoyıp, qurılısın baslap berdi.
Usı kúni Prezident Shavkat Mirziyoev Tashkent qalasınıń Yakkasaray rayonında bolıp, Shota Rustaveli kóshesinde ámelge asırılǵan rekonstrukciya jumısların kózden ótkerdi.
Jol infrastrukturasın rawajlandırıw hám transportlardıń háreketine qolaylıq jaratıw xalıq sanı turaqlı artıp, aymaǵı keńeyip atırǵan Tashkent ushın áhmiyetli másele. Sol sebepli, tegis jollar, sawlatlı kópirler qurılıp, zaman talaplarına say ońlanbaqta.
Shota Rustaveli kóshesi paytaxtımızdıń bir neshe rayonların baylanıstıratuǵın oraylıq jol bolıp esaplanadı. Transportlardıń háreketleniwine qolaylıq jaratıw maqsetinde onıń Mirobod kóshesinen CHoshtepa kóshesine shekemgi derlik 7 kilometrlik bólegi rekonstrukciyalandı.
Endi 10 qatnaw bólegine bólingen joldıń 6 polosasında avtomobiller, arnawlı ajıratılǵan 2 jóneliste avtobuslar háreketlenedi. Qalǵan 2 jol bolsa avtomobiller toqtap turıwı ushın mólsherlengen.
Prezidentimiz mámleketlik hám jámiyetlik shólkemlerdiń wákilleri menen birgelikte avtobusta júrip, qolaylıqlardı kórdi, jolawshılar menen qızǵın sáwbetlesti.
Kóshe ortasında rawajlanǵan mámleketlerdiń aldınǵı tájiriybesinen kelip shıǵıp, BRT (Bus Rapid Transit) sisteması tiykarında ajıratılǵan avtobus jolı Tashkent qalasında birinshi márte ámeliyatqa engizildi. Bul jámiyetlik transport qatnawın tezlestirip, jolawshılarǵa qolaylıqlardı jaqsıladı.
Ulıwma bahası 19,2 million dollarlıq bul joybardıń nátiyjesinde jolawshı aǵımı saatına 2 mıń 500 den 6 mıńǵa arttı. Sonday-aq, sutkasına 40 mıń avtomobildi ótkeriw imkaniyatı jaratılıp, ortasha tezlik saatına 23 kilometrden 30 kilometrge jetkerildi.
Eń áhmiyetlisi, bul ózgerisler nátiyjesinde qáwipsizlik dárejesi artıp, jol-transport hádiyseleri azayadı.
Joybar sheńberinde avtobuslar toqtawı ushın 21 jańa bándirgi, 463 “aqıllı” svetofor ornatıldı. Intellektuallıq transport sisteması engizildi. Jol boyında avtomobillerdiń toqtap turıwı ushın da sharayat inabatqa alınǵan.
Sonday-aq, velosiped jolları, jasıl aymaqlar, suwǵarıw hám drenaj sistemaları qurıldı.
Bul jerde Tashkent qalasında óz aldına ajıratılǵan avtobus jolların uzaytıw, qala átirapında transport baylanısların shólkemlestiriw joybarları tanıstırıldı.
– Eger metro jolların qurmaǵanımızda, jańa avtobuslar alıp kelmegenimizde búgin Tashkentte transport qatnawı qıyın bolar edi. Sonıń ushın adamlardı razı etiw kózqarasınan jollardı durıslap atırmız, jámiyetlik transporttı rawajlandırıp atırmız. Bunday jumıslardı barlıq qalalarımızda dawam ettiremiz, – dedi Prezident.
Mámleketimiz basshısı juwapkerlerge jámiyetlik transport ushın qolaylıqlardı arttırıp, tıǵılıstı azaytıw, qalanı Jańa Tashkent penen nátiyjeli baylanıstırıw boyınsha tapsırmalar berdi.
Shota Rustaveli kóshesiniń jańa kelbeti tek ǵana paytaxt gózzallıǵın arttırıp qoymastan, al Tashkenttiń zamanagóy hám intellektual transport sistemasına qádem qoyǵanın kórsetedi.
Mámleketimiz basshısı paytaxtımızdıń Yangihayot rayonındaǵı “Yangi avlod” arnawlı sanaat zonasındaǵı alyumin qadaq islep shıǵarıw, salqın ishimlikler quyıw kárxanasınıń jumısı menen tanıstı.

Sońǵı jılları mámleketimizde sanaatlastırıw siyasatı jańa basqıshqa kóterildi. Ózine tán óndiris quwatlılıǵı hám xalıqaralıq texnologiyalıq standartlar tiykarında ekonomikalıq ósiw modeli qáliplesti.
“Yangi avlod” arnawlı sanaat zonası Prezidentimizdiń 2024-jıl 20-marttaǵı tiyisli qararına tiykarlanıp shólkemlestirilgen. Ol zamanagóy óndiris infrastrukturası, qolaylı logistika imkaniyatları hám investorlar ushın jaratılǵan keń imkaniyatlar menen ajıralıp turadı.
Aymaqtaǵı perspektivalı joybarlardan biri “East Can Solutions” kompaniyası tárepinen ámelge asırılmaqta. Bul jerde alyumin qadaq islep shıǵarıw hám salqın ishimlikler quyıw kompleksi shólkemlestirildi.
Prezidentimiz joybardıń perspektivası, ol jerde tayarlanıp atırǵan ónimlerdiń kórgizbesi menen tanıstı. Usı jerde joybarǵa rásmiy start berildi.
Kárxana 21 gektar aymaqta jaylasqan. Bahası 90 million dollar bolǵan bul joybar tiykarınan sırt el investiciyaları esabınan qarjılandırılmaqta.
Oraylıq Aziyadaǵı sanawlı kárxanalar qatarına kiretuǵın bul kompleks AQSh, Ullı Britaniya, Italiya hám Germaniyada islep shıǵarılǵan zamanagóy úskeneler menen támiyinlendi. Óndiris procesi bolsa tolıq sanlastırılǵan.
Kárxananıń quwatlılıǵı basqıshpa-basqısh arttırıp barıladı. Birinshi basqıshta jılına 600 million dana, keyingi basqıshlarda bolsa 1,1 milliard hám 2,2 milliard dana alyumin qadaqlaw ónimleri islep shıǵarıladı. Bul kórsetkishler tek ǵana ishki bazardıń talabın qanaatlandırıw emes, al regionallıq kólemde básekige shıdamlı ónimdi eksport etiw imkaniyatın da jaratadı.
Joybardıń iske qosılıwı nátiyjesinde 60 million dollarlıq importtıń ornı qaplanıp, 20 million dollarlıq eksport imkaniyatı jaratıladı.
Lokalizaciyalaw dárejesi 90 procentke jetkeriledi. Itibarlı tárepi, kárxanadaǵı barlıq joybarlar tolıq iske qosılıwı menen 500 jańa jumıs ornı jaratıladı. Byudjet ushın bolsa salmaqlı salıq túsimleri támiyinlenedi.
Prezidentke bul jerde “Yangi avlod” arnawlı sanaat zonasında ámelge asırılıp atırǵan jumıslardıń barısı haqqında málimleme berildi.
Juwapkerler sanaat zonasınıń ulıwma rawajlanıw strategiyası, lokalizaciyalaw, sanlastırıw hám energiyanı únemleytuǵın texnologiyalardı engiziw boyınsha islengen jumıslar haqqında maǵlıwmat berdi.
Bul jerde azıq-awqat, elektrotexnika, mashina qurılısı, ximiya hám qurılıs materialları baǵdarlarında jámi 1 milliard 200 million dollarlıq 58 joybar ámelge asırılmaqta. Mámleketimiz basshısına olardıń 28 i tanıstırıldı. Jaqın keleshekte ámelge asırılatuǵın bul baslamalardıń nátiyjesinde 7 mıń 600 jańa jumıs ornı jaratıladı.
Olar tek ǵana ekonomikalıq nátiyje emes, al jańa jumıs orınları, eksport potencialı hám jergilikli óndiris tarmaqların rawajlandırıw arqalı sociallıq turaqlılıqqa da xızmet etetuǵını atap ótildi.
Mámleketimiz basshısı “Anglesey Food” juwapkershiligi sheklengen jámiyetiniń ónimlerdi saqlaw hám bólistiriw orayınıń jumısın da barıp kórdi.
“Yangi avlod” arnawlı sanaat zonası aymaǵında shólkemlestirilgen bul kárxana “Korzinka” dúkanlar tarmaǵı ushın ónimlerdi saqlaw, saylap alıw hám qadaqlaw xızmetlerin kórsetedi.
Kárxana 10 gektar maydanda jaylasqan bolıp, 49 mıń kvadrat metr aymaqqa qoymaxana jaylastırılǵan. Qurılıs materialları hám muzlatqısh kameraları ushın úskeneler Qıtay, Túrkiya, Belarus hám Rossiya mámleketlerinen alıp kelingen, barlıǵı “EDGE Advanced” xalıqaralıq sertifikatına iye.
Bul joybar Oraylıq Aziyadaǵı “A” klasına kiretuǵın eń iri bólistiriw orayı esaplanadı. Bir waqıttıń ózinde 145 dárwazada tegislewshi úskeneler júkti júklew hám túsiriw imkaniyatına iye.
Orayda 4 túrli temperaturalı aymaq bar. Sonlıqtan, ónimler túrine qarap muzlatqıshta, tómen temperaturalı suwıtıw kameralarında hám qurǵaq jerde saqlanadı.
Sonday-aq, orayda kúni-túni isleytuǵın 96 sınaw usılına iye arnawlı laboratoriya qurıladı. 1 mıńnan aslam jańa jumıs orınları jaratıladı.
Tanısıw juwmaǵında bolıp ótken jámiyetshilik wákilleri menen sóylesiwde aqılǵa uǵras ekonomikalıq siyasat hám investorlardıń oǵan isenimi haqqında sóz boldı.
– Sońǵı segiz jılda 130 milliard dollarlıq sırt el investiciyası kirip keldi, bul qanshadan-qansha zavod hám kárxanalarǵa aylandı. Búgin de jáne bir úlken joybar – jańa xalıqaralıq aeroporttıń qurılısın basladıq. Oǵan Saudiya Arabstanı, Yaponiya, Koreya investiciya kirgizbekte. Bul óz-ózinen bolmaydı. Bul – mámleketimiz keleshegine bolǵan úlken isenim belgisi, – dep atap ótti Prezidentimiz.
Prezident Shavkat Mirziyoev Tashkent wálayatınıń Tómengi Shırshıq rayonındaǵı “TST Rice” salıgershilik klasteriniń jumısı menen de tanıstı.
Bul juwapkershiligi sheklengen jámiyette salı jetistiriw hám onı tereń qayta islew boyınsha tolıq sanaat shınjırı jaratılǵan.
Aytıp ótiw kerek, aldın salıgershilik jumısı izbe-izlikte shólkemlestirilmegeni ushın durıs dáramat ala almaytuǵın edi. Ásirese, salını qayta islewde kóplegen mashqalalarǵa dus keletuǵın edi. Sońǵı jılları ayrıqsha itibar sebepli tarawda sapa ózgerisleri baslandı, nátiyjelilik arttı.
Házirgi kúnde Tashkent wálayatında da salı jetistiriw tarmaǵında belgili jetiskenliklerge erisilmekte.
Wálayatta bıyılǵı jıldıń ónimi ushın 8,7 mıń gektar salı egildi. Suwdı únemleytuǵın texnologiyalar ushın 3 mıń gektar jer lazerli tegislendi. Nátiyjede wálayat boyınsha 60 million kub metr suw únemlendi, 522 tonna tuqımnıń jumsalıwı azaydı.
Sonıń ishinde, “TCT Rice” klasteri tárepinen 2 mıń gektardan aslam maydanda “Iskandar”, “Guliston”, “Nukus” sortları egilip, tárbiyalanǵan.
Házirgi kúnde 985 gektar maydanda salı jıynap alınıp, gektarınan ortasha 65-70 centnerden, ayırım atızlarda 80-85 centnerden zúráát alındı.
Mámleketimiz basshısı bul jerde fermerler, awıl xojalıǵı veteranları menen sáwbetlesti. Olar zúráátli sortlar hám jańasha agrotexnologiyalar sebepli miynetten mápdarlıq artıp atırǵanın ayttı.
– Búgin barlıq tarawda ilimge, innovaciyaǵa, aldınǵı texnologiyalarǵa súyenip atırmız. Awıl xojalıǵında da bazar principlerin engizip, dáramattı arttırmaǵanda búgingidey zúráátlilik bolmas edi. Sońǵı waqıtları tábiyat ózgerip, suw jetispewshiligi artpaqta. Endi diyqanlar buǵan beyimlesip islewi, tamshılatıp suwǵarıw, suwdan únemlep paydalanıwdı úyreniwi kerek, – dedi Prezident.
Tarawdaǵı sırt el tájiriybelerin úyreniw, ilim menen miynet ónimdarlıǵın arttırıw áhmiyetli ekeni atap ótildi. Juwapkerlerge zúráátli sortlardı kóbeytiw, qayta islewdi kúsheytiw, suwdı únemleytuǵın texnologiyalardan nátiyjeli paydalanıw, jańa jumıs orınların jaratıw boyınsha kórsetpeler berildi.

ÓzA