AQShtıń Tennessi shtatında jaylasqan “Accurate Energetic Systems” (AES) áskeriy snaryad islep shıǵarıw zavodında júz bergen kúshli jarılıw aqıbetinde qaytıs bolǵan shaxslardıń atları rásmiy túrde járiyalandı.

10-oktyabr kúni azanda Xikman okruginde júz bergen hádiysede jumısshılardan hesh kim tiri qalmaǵan. Xikman hám Xemfris okrugleri sherifleri Jeyson Kraft hám Kris Devis baspasóz ánjumanında qurbanlar dizimin oqıp esittirdi hám olardıń shańaraqlarına járdem kórsetiw zárúrligin atap ótti.
Atap ótiliwinshe, jarılıw sebebi ele anıqlanbaǵan. Házirgi waqıtta spirtli ónimler, temeki, qural hám jarılıwshı zatlar boyınsha federal byuro (ATF) tárepinen tergew alıp barılmaqta.
Hákimiyat wákiliniń atap ótiwinshe, atlardıń járiyalanıwı deneler tolıq tabılǵanın ańlatpaydı – identifikaciya procesi dawam etpekte.
Apatshılıq ornında hawadan alınǵan kóriniste janǵan mashinalar, wayran bolǵan imaratlar kórinedi. Geologiya xızmeti jarılıw kúshiniń 1,6 magnitudalı jer silkiniwge teń bolǵanın atap ótken.

Dilshod Hakimov, ÓzA