Qıtay jaz aylarında optikalıq talshıqlı dronlardı islep shıǵarıw ushın zárúr bolǵan tiykarǵı komponentler eksportın keskin arttırıp, Rossiyaǵa sezilerli járdem kórsetti. Bul haqqında statistikalıq maǵlıwmatlarǵa súyenip, Washington Post xabar berdi. Málim etiliwinshe, bul járdem Ukraina qorǵanıwın front shegarasında bastırıwǵa imkaniyat bergen.

Gáp optikalıq talshıqlı kabeller hám litiy-ion batareyalardıń eksportı haqqında barmaqta. Rossiya hám Qıtay islep shıǵarıwshıları arasındaǵı tıǵız birge islesiw Moskvaǵa urısta áhmiyetli ústinlik bermekte.
Rossiyada bolıp turǵan 770 mıń nızamsız migrant mámleketti tárk etpese, májbúriy deport etiledi. Bul haqqında Rossiya Mámleketlik dumasınıń baslıǵı Vyacheslav Volodin xabar berdi. Mámlekette 5-fevraldan baslap qadaǵalaw astındaǵı shaxslar reestri iske túsken. Bul sistema Rossiya aymaǵında nızamsız jasap atırǵan migrantlar haqqındaǵı maǵlıwmatlardı toplaydı. Segiz ay dawamında migraciya nızamshılıǵın buzǵan derlik 35 mıń adam mámleketten shıǵarıp jiberilgen. 1-sentyabr jaǵdayına bola, reestrde 770 mıń adam dizimge alınǵan bolıp, olardıń úshten bir bólegin hayal-qızlar hám balalar quraydı.
Túrkiya prezidenti Rejep Tayyip Erdoǵan túrkiy mámleketler puqaraların jumısqa jaylastırıw tártibin ápiwayılastırıwshı pármanǵa qol qoydı. Hújjet 10-oktyabr kúni Resmî Gazete rásmiy xabarshısında járiyalandı. Endi Ázerbayjan, Qazaqstan, Qırǵızstan, Túrkmenstan hám Ózbekstan puqaraları ruqsatnama alıwdıń quramalı processlerinen ótpesten Túrkiyada islewi múmkin boladı. Olarǵa mámleketlik hám jeke menshik strukturalarda isbilermenlik jáne kásiplik jumıs penen shuǵıllanıwǵa ruqsat berildi. Armiya hám qáwipsizlik mákemelerinde xızmet etiw buǵan kirmeydi.
Izrail tárepinen tınıshlıq kelisimi boyınsha azat etilgen 154 palestinalı tutqın súrgin etildi. Bul haqqında Al Jazeera xabar berdi. Tutqınlardıń shańaraq aǵzaları jaqınları úshinshi mámleketlerge súrgin etiliwinen narazı. HAMAS 13-oktyabr kúni 20 izraillı tutqındaǵılardı Izrailǵa tapsırǵan. Evrey mámleketi bolsa 154 qamaqtaǵı adamlardı súrgin etiwge májbúrlemekte.
Microsoft korporaciyası 14-oktyabrden baslap Windows 10 operacion sistemasın qollap-quwatlawdı rásmiy túrde juwmaqladı. Endi Windows 10 paydalanıwshıları sistema ushın qáwipsizlik, programmalıq támiynat jańalanıwları hám texnikalıq járdem ala almaydı. Sol sebepli kompaniya Windows 11 versiyasına ótiwdi usınıs etpekte. Eger qurılma Windows 10 texnikalıq talaplarına juwap bermese, Microsoft qosımsha tólem esabınan Windows 10 ushın keńeytilgen qáwipsizlik jańalanıwları (ESU) baǵdarlamasın usınadı.

Iroda Jwraeva, Uluǵbek Twxtaev, ÓzA