Prezidentimiz tárepinen elimizde ishki turizmdi rawajlandırıw boyınsha alǵa qoyılǵan baslamalarǵa tiykarlanıp mákeme hám shólkemlerde jumıs islep atırǵan xızmetkerlerdiń mádeniy dem alıwın, ruwxıy kózqarasın keńeytiw maqsetinde shólkemlestirilip atırǵan sayaxatlar kóbeymekte.

Qaraqalpaqstan Respublikası Bajıxana basqarmasınıń bir topar xızmetkerleriniń Ferǵana wálayatınıń tariyxıy hám mádeniy orınlarına sayaxatı shólkemlestirildi.
Sapar etiw baǵdarlamasına tiyarlanıp, olar Qoqand qalasındaǵı Xudayarxan sarayı arxitekturalıq kompleksinde boldı.
Saray Qoqandtıń haqıyqıy gáwharı hám qalanıń tiykarǵı tariyxıy dıqqatqa ılayıq orınlarınan biri esaplanadı. Onı xalıq arasında “Qoqand orda”, dep te ataydı. Bul saraydıń tariyxı, siyrek ushırasatuǵın naǵısları hám ózine tán arxitekturalıq kórinisi dıqqatqa ılayıq.
Qala imaratları názik bezewler menen qaplanǵan hám hámme jerde belgili bolǵan óziniń ıdıs-tabaqları hám gúlalshılıǵı menen belgili. Sayaxatshılar Rishton rayonındaǵı Oraylıq Aziyadaǵı eń áyyemgi gúlalshılıq orayında milliy ónermentshilik dástúrleri menen de tanıstı. Qala keramika islep shıǵarıwdıń ózine tán texnologiyasına iye. Jergilikli ónimler ózine tán bezewi, naǵıs hám formaları menen sayaxatshılarda úlken tásir qaldırdı.
Álbette, bunday mádeniy-aǵartıwshılıq saparlar xızmetkerlerdiń bilim hám kózqarasın keńeytiw, milliy qádiriyatlarımızǵa bolǵan húrmet, itibar hám qızıǵıwshılıqtı arttırıwǵa xızmet etedi.

Á.Jiyemuratov,
Qaraqalpaqstan xabar agentligi