Búgin Tashkentte Mámleketlik qarjını basqarıw boyınsha xalıqaralıq birge islesiw bilimlendiriw baǵdarlaması (PEMPAL) sheńberinde “Ǵaznashılıq jumısın modernizaciyalaw hám sanlastırıw” temasındaǵı Ǵaznashılıq ámeliyatı jámiyetshiliginiń (TCOP) jalpı májilisi óz jumısın basladı.

Jáhán banki menen birgelikte shólkemlestirilgen bul ilajda Evropa hám Oraylıq Aziya regionınıń 18 mámleketinen 70 ten aslam ǵaznashılıq hám mámleketlik qarjı tarawınıń qánigeleri qatnaspaqta. Sonday-aq, dodalawlarda Jáhán banki, Ekonomikalıq birge islesiw hám rawajlanıw shólkemi (OECD) hám Koreya Fiskal málimleme xızmetiniń xalıqaralıq ekspertleri de qatnaspaqta.
Jalpı májilistiń ashılıwında Ózbekstan Respublikası ekonomika hám qarjı ministriniń orınbasarı Gulnora Rahimova, Jáhán bankiniń PEMPAL baǵdarlamasınıń basshısı Arman Vatyan hám basqalar shıǵıp sóylep, tárepler arasındaǵı birge islesiw ǵaznashılıq jumısın modernizaciyalaw hám sanlastırıwda úlken áhmiyetke iye ekenin atap ótti.
– Elimizde birinshi márte ótkerilip atırǵan bul ilaj tek ǵana Ózbekstanda emes, al regionda da úlken áhmiyetke iye. Sebebi mámleket bul baslamalarda belsene qatnasıp, úlken jetiskenliklerge erispekte. Bul imkaniyat mámlekettiń sanlastırıw, ǵazna jumısın jetilistiriw hám operaciyalıq nátiyjelilikti arttırıw tarawındaǵı jetiskenliklerin dodalaw hám úyreniw ushın áhmiyetli bolıp esaplanadı. Ózbekstan sanlastırıw hám innovaciyalar tarawında isenimli hám jedel qatnas jasamaqta. Tashkenttegi rawajlanıwlar tek ǵana qurılıs hám urbanizaciyada emes, al mámleketlik qarjı reformalarında da seziledi. Jáhán bankiniń wákili sıpatında men Ózbekstan Húkimeti hám Ekonomika hám qarjı ministrligi menen birgelikte islep atırǵanımnan quwanıshlıman.
Ózbekstan tek ǵana PEMPAL aǵzası emes, al donor mámleket sıpatında da áhmiyetli rol atqaradı. Bul ilajda Evropa hám Oraylıq Aziyadan tısqarı, Koreya da qatnasadı. Onda global rawajlanıwlar hám birge islesiw perspektivaları dodalanadı. Juwmaqlap aytqanda, bul májilis regiondaǵı finanslıq birge islesiwdi rawajlandırıw, jańa tájiriybelerdi úyreniw hám ulıwmalıq jetiskenliklerdi esapqa alıw ushın áhmiyetli imkaniyat bolıp esaplanadı, – dedi PEMPAL baǵdarlamasınıń basshısı Arman Vatyan.
Qánigelerdiń maǵlıwmatına bola, PEMPAL jumısı Ózbekstanda mámleketlik qarjını basqarıw tarawında áhmiyetli innovaciyalardı engiziwge sezilerli úles qosqan. Puqaralardıń qatnasıwındaǵı byudjetlestiriw (Baslamalı byudjet) ámeliyatınıń engiziliwi, yaǵnıy puqaralarǵa mámleketlik qarjılardıń bólistiriliwi hám jumsalıwı procesinde qatnasıw imkaniyatın beriw, sonday-aq, birden-bir ǵazna esabınan nátiyjeli paydalanıw hám ishki audit sistemasın rawajlandırıw sıyaqlı baǵdarlar usılardıń qatarına kiredi. Mámleketlik qarjını basqarıwdı bekkemlew Turaqlı rawajlanıw maqsetlerine erisiw hám puqaralardıń abadanlıǵın arttırıw ushın áhmiyetli shárt bolıp esaplanadı.
Esletip ótemiz, TCOP jalpı májilisi 16-oktyabr kúni juwmaqlanadı.

Nasiba Ziyodullaeva, ÓzA