Ózbekstan Respublikası Prezidenti Shavkat Mirziyoev elimizde sapar menen bolıp turǵan Birlesken gúres dúnyasınıń basshısı Nenad Lalovichti qabılladı.

Bul abıraylı globallıq struktura menen Ózbekstanda sporttıń jeke gúres túrlerin shólkemlestiriwshilik-ekspertlik jaqtan qollap-quwatlaw hám jáne de ǵalaba en jaydırıw tarawında ámeliy birge islesiwdi keńeytiw máseleleri kórip shıǵıldı.
Mámleketimizde dástúriy tárizde grek-rim gúresi, erkin gúres, hayal-qızlar gúresi, sonday-aq, aralas jawıngerlik ónerleri jedel rawajlanıp atırǵanın atap ótiw kerek.
Keyingi jılları jeke gúresshilerimiz abıraylı jarıslarda 45 joqarı sıylıqtı, sonıń ishinde, Olimpiada oyınları hám jáhán chempionatlarında altın medallardı qolǵa kirgizdi.
Sóylesiwler waqtında xalıqaralıq birlespe basshısı Jańa Ózbekstanda ǵalabalıq sport tarawında ámelge asırılıp atırǵan keń kólemli reformalardı, sonıń ishinde, qolaylı hám zamanagóy infrastrukturanı keńeytiw, abıraylı turnir hám jarıslardı turaqlı ótkeriw arqalı jaslardı sport háreketine keńnen tartıw baǵdarındaǵı jumıslardı joqarı bahaladı.
Mámleketimizde iri kontinent hám jáhán chempionatların shólkemlestiriw, shólkemniń qáwenderliginde Regionallıq gúres akademiyasın shólkemlestiriw, sport medicinası, dietologiyası, psixologiyası hám basqa da tiykarǵı baǵdarlarda sheriklik máseleleri dodalandı.
Prezidentimiz balalar hám jaslar arasında sport jeke gúreslerin ǵalaba en jaydırıw, talantlılardı tańlap alıw hám tayarlawdıń zamanagóy usılların engiziw, máhállelerdegi dógerekler hám zallardan baslap sport sheberligi mektepleri hám qánigelesken komplekslerge shekemgi infrastrukturanı jetilistiriw zárúr ekenligin atap ótti. Bul ilajlar, mámleketimiz basshısınıń atap ótkenindey, Olimpiada oyınları hám basqa da iri jarıslarda jańa tabıslarǵa alıp keliwi kerek.
Ushırasıw juwmaǵında Ózbekstan Prezidenti ǵalabalıq sport hám jeke gúres túrlerin rawajlandırıw jáne qollap-quwatlawǵa qosqan úlken jeke úlesi ushın Nenad Lalovichke mámleketimizdiń joqarı sıylıǵı – “Dwstlik” ordenin tapsırdı.

ÓzA