Elimizde xalıq arasında sport hám dene tárbiyasın ǵalaba en jaydırıw, jas áwlad ushın salamat turmıs tárizin qáliplestiriw jolında alıp barılıp atırǵan sistemalı jumıslardıń nátiyjesinde búgin bir qatar qábiletli sportshılar kamalǵa kelmekte.

Mine, usınday jaslardıń biri qılıshlasıw boyınsha Ózbekstan saylandı komandasınıń aǵzası, “Shuhrat” hám “Jasorat” medallarınıń iyesi Zaynab Dayıbekova bolıp tabıladı.
2002-jıldıń 19-noyabr kúni Qaraqalpaqstannıń Nókis qalasında tuwılǵan Zaynabtıń sportqa bolǵan muhabbatı shańaraqtaǵı salamat ortalıq hám aymaqta jaratılǵan sport infrastrukturası menen tıǵız baylanıslı. Ol 13 jasında qılıshlasıw menen shuǵıllanıwdı baslap, birinshi trener Daurbek Jiemuratovtıń qol astında dáslepki sheberlik sırların úyrendi.
Rayon hám respublika chempionatlarında tabıslı qatnasqan jas sportshı 2016-jıldan milliy saylandı komanda aǵzası boldı. Aradan kóp ótpey, ol Taylandta bolıp ótken Aziya chempionatında mámleketimiz tariyxındaǵı dáslepki qola medalın qolǵa kirgizdi. Bul nátiyje Zaynabtıń ómirinde jańa basqısh bolıp, onıń miyneti mámleket tárepinen de tán alındı – Prezident tárepinen “Nexia-3” markalı avtomashina menen sıylıqlandı.
2018-2019-jıllarda ol bir qatar abıraylı jarıslarda altın hám qola medalların qolǵa kirgizdi. Atap aytqanda, 2019-jılǵı Aziya chempionatında jeńimpazlıqtı qolǵa kirgizdi, Jáhán kuboginde bolsa jeke tártipte altın, komandalıq bellesiwlerde qola medalına miyasar boldı.
2021-jılı Zaynab Dayıbekova Tokio Olimpiadasında qatnastı. Onıń bul iri jarıstaǵı qatnasıwın mámleketimiz basshısı joqarı bahalap, “Shuhrat” hám “Jasorat” medalları, sonday-aq, “Qaraqalpaqstan Respublikasına xızmet kórsetken sportshı” húrmetli ataǵı menen sıylıqladı.
2023-jılı Xanchjou qalasında ótkerilgen XIX jazǵı Aziya oyınlarında ol Ózbekstan bayraqshısı sıpatında bellesiwge shıqtı. Sablya baǵdarında jeke bellesiwlerde qola, komandalıq bellesiwlerde bolsa altın medaldı qolǵa kirgizip, milliy saylandı komanda tariyxındaǵı áhmiyetli nátiyjelerden birin atap ótti.
Zaynab Dayıbekova ushın sońǵı eki jıl da tabıslarǵa bay boldı.
2024-jıl fevral ayında Perudıń Lima qalasında bolıp ótken úlkenler arasındaǵı jáhán kuboginde ol qola medalın qolǵa kirgizdi. Usı nátiyje menen sportshı “Parij-2024” Olimpiada oyınlarına reyting arqalı tikkeley licenziya aldı.
2025-jıl yanvar ayında Tuniste bolıp ótken Gran-pri jarısında dúnyanıń eń kúshli 8 qılıshpaz qızlarınıń qatarına kirdi. Usı jılı iyun ayında Bali (Indoneziya)degi Aziya chempionatında qola medalı menen sıylıqlandı. Sentyabr ayında bolsa Belgiyanıń Gent qalasında ótken “Flemish Open” xalıqaralıq turnirinde jáne bir márte qola medalına iye boldı.
– Iyul ayına shekemgi máwsim men kútken nátiyjeler menen juwmaqlanbadı, – deydi Zaynab Dayıbekova. – Biraq sentyabr ayınan baslanǵan jańa jarıs máwsimi tabıslı baslandı. Belgiyadaǵı turnirde qolǵa kirgizilgen qola medalı baslanıwı. Aldımızda jáhán kubokları, Gran-pri basqıshları hám Islam tileklesligi oyınları sıyaqlı áhmiyetli jarıslar tur. Házirgi waqıtta mine usı jarıslarǵa qatań tayarlıq kórip atırman.
Zaynab Dayıbekova sıyaqlı márt sportshılarımızdıń jeńisleri Watanımızdıń abırayın ulıǵlaw menen birge, jas áwlad ushın úlgi bolıp, mámleketimizde sport tarawınıń rawajlanıwına múnásip úles qosıp kelmekte.

Javohir Toshxwjaev, ÓzA