Ózbekstan mámleketlik konservatoriyası Nókis filialında «Akademiyalıq qosıq atqarıwshılıǵı» atamasındaǵı oqıw qollanbasınıń prezentaciyası bolıp ótti.

Prezentaciyada qatnasqan professor-oqıtıwshılar, vokal kórkem óneri tarawınıń qánigeleri filialdıń «Ulıwma kásiplik hám social-gumanitar pánler» kafedrası aǵa oqıtıwshısı, «Watan pidayısı» kókirek belgisi iyesi Baǵdagúl Jaqsımuratovanıń avtorlıǵında shıǵarılǵan bul qollanba vokal shıǵarmalardıń tariyxı, atqarıw usılları, vokal atqarıw texnikasına tiyisli maǵlıwmatlar, muzıkalı shıǵarmalar, shınıǵıw, vokalizler, ariyalar, xalıq qosıǵı hám taǵı basqa máseleler sóz etilgenligi menen áhmiyetli ekenin atap ótti.
Qollanba vokal kórkem óneri akademiyalıq qosıqshılıq qánigeligi studentleri ushın mólsherlengen bolıp, tiyisli jónelistiń oqıw baǵdarlaması tiykarında dúzilgen. Onda vokal kórkem óneri ushın jazılǵan shıǵarmalardı teoriyalıq hám ámeliy jaqtan ózlestiriwge tiykarǵı dıqqat qaratılǵan.
– Elimizde vokal muzıka kórkem óneri rawajlanǵan búgingi dáwirde bul qollanba studentlerimizdiń estetikalıq hám kórkemlik jaqtan talǵamın tárbiyalawǵa úlken járdem beredi, – deydi filial direktorı R.Allanbaev. – Kásipleslerimizdi jańa kitaptıń jarıq kóriwi menen qızǵın qutlıqlap, B.Jaksımuratovanıń aldaǵı dóretiwshilik jumıslarına tabıslar tileymiz.
Kitap prezentaciyası Vokal kórkem óneri: akademiyalıq qosıqshılıq qánigeliginiń qábiletli student-jasları atqarıwındaǵı janlı koncert baǵdarlaması menen dawam etti.

Qaraqalpaqstan xabar agentligi