Ózbekstan Respublikası Qurallı Kúshleriniń belgili wákili, mámleketimizdiń birinshi qorǵanıw ministri, otctavkadaǵı general-polkovnik Rustam Wrmonovich Ahmedov bıyıl 12-oktyabr kúni 82 jasında qaytıs boldı.

R.Ahmedov 1943-jılı 10-noyabrde Ferǵana wálayatınıń Baǵdad rayonında tuwıldı. Orta mektepti tamamlagannan soń dáslep Tashkent joqarı tank komandirlik oqıw ornında, keyin Moskva qalasındaǵı Polatqa qaplanǵan tank armiyaları áskeriy akademiyasında bilim aldı.
Pútkil ómirin áskeriy tarawǵa baǵıshlaǵan R.Ahmedov tank polkında vzvod komandiri, tank diviziyası siyasiy bólimi baslıǵınıń járdemshisi, tank diviziyası batalonı komandiriniń siyasiy isler boyınsha orınbasarı, Tashkent joqarı tank sárkardalıq bilim jurtı kursantlar batalonı komandiriniń orınbasarı lawazımlarında xızmet etip, jeke quramdı basqarıw, onıń áskeriy, fizikalıq hám ruwxıy tayarlıǵın arttırıw boyınsha jeterli bilim hám tájiriybe arttırdı.
Tashkent joqarı tank sárkardalıǵı, Samarqand joqarı áskeriy avtomobil sárkardalıǵı hám Tashkent joqarı ulıwma áskeriy sárkardalıq bilim jurtlarında basshılıq lawazımlarında islegen jıllarında onıń shólkemlestiriwshilik qábileti ayqın kórindi.
Watanımız ǵárezsizlikke eriskennen soń R.Ahmedov Ózbekstan Respublikası qorǵanıw ministri, házirgi waqıtta belgili múddet Milliy gvardiya sárkardası wazıypasın atqarıwshı sıpatında belsendi jumıs alıp barıp, milliy armiyamızdı qáliplestiriw, mámleketimizdiń qorǵanıw sistemasın qurıw, áskeriy kadrlardı tayarlaw jolında jankúyerlik kórsetti. Qorǵanıw ministrliginiń Bas shtabı qayta shólkemlestirilip, Qurallı Kúshler Birlesken shtabına aylandırıldı, áskeriy okrugler dúzildi, áskeriy bólimlerdiń jaylasıwı hám basqarıw sisteması jetilistirildi. Qorǵanıw ministrliginiń basqa kúsh strukturaları menen birge islesiwin bekkemlew boyınsha keń kólemli jumıslar ámelge asırıldı.
R.Ahmedov 1997-1998-jılları Ózbekstan Respublikası ayrıqsha jaǵdaylar ministri lawazımında da nátiyjeli jumıs alıp bardı.
Húrmetli general, úlken jasta bolıwına qaramastan, Jańa Ózbekstanda Qurallı Kúshlerdi modernizaciyalaw, áskeriy xızmetkerlerdiń jawıngerlik hám ruwxıy tayarlıǵın arttırıw baǵdarındaǵı úlken reformalardı ámelge asırıwda qorǵanıw ministriniń keńesgóyi sıpatında óziniń bay bilim hám tájiriybesi menen belsene qatnastı. Qaysı lawazımda xızmet etpesin, áskeriy antına sadıq qalıp, ózine júklengen wazıypalardı juwapkershilik hám maqtanısh penen orınladı, jaslardı watansúyiwshilik ruwxında tárbiyalawda jeke úlgi kórsetti.
R.Ahmedovtıń áskeriy tarawdaǵı xızmetleri mámleketimiz tárepinen múnásip sıylıqlandı. Ol Ózbekstan Respublikasınıń II dárejeli “Shon-sharaf” hám “Dwstlik” ordenleri menen sıylıqlanǵan.
Belgili áskeriy sárkarda, keńpeyil hám kishipeyil insan Rustam Ahmedovtıń esteligi kewillerimizde máńgi saqlanıp qaladı.

Sh.Mirziyoev, T.Norboeva, N.Ismoilov,
A.Aripov, V. Maxmudov, Sh. Xalmuxamedov