Nızam joybarına túsinik

Bizge belgili, búgingi kúnde on mıńlaǵan, júz mıńlaǵan watanlaslarımız túrli sırt ellerde jasap, oqıw yamasa jumıs penen shuǵıllanbaqta. Mámleketimizde barlıq tarawda ámelge asırılıp atırǵan reformalar menen bir qatarda sırt elde jasap atırǵan watanlaslarımızdı qollap-quwatlaw, olardıń huqıqları menen máplerin qorǵawǵa tiykarǵı áhmiyet qaratılmaqta.
Endi “Mámleketlik bajı haqqında”ǵı Ózbekstan Respublikası Nızamınıń 13-statyasına qosımsha hám ózgeris kirgiziw haqqında”ǵı nızam joybarında názerde tutılıp atırǵan normalar menen bul baǵdardaǵı háreketler izbe-iz dawam ettiriledi. Bul nızam joybarı haqqında Oliy Majlis Nızamshılıq palatasınıń deputatı Nodir Tilavoldiev tómendegilerdi atap ótti:
– Mámleketimizde sırt elde jasap atırǵan watanlaslar menen turaqlı qarım-qatnas hám birge islesiwdi rawajlandırıw, olardı tariyxıy Watanı átirapında jáne de birlestiriw, olardıń elimizde alıp barılıp atırǵan reformalardaǵı qatnasın xoshametlew, huqıqları menen máplerin tolıq qorǵaw baǵdarında sistemalı jumıslar ámelge asırılmaqta. Atap aytqanda, 2018-jılı “Sırt elde jasap atırǵan watanlaslar menen birge islesiw tarawında Ózbekstan Respublikasınıń mámleketlik siyasatı koncepciyası” qabıl etildi. 2021-jılı “Vatandoshlar” jámiyetlik fondı shólkemlestirildi. Prezidentimizdiń 2024-jıl 20-noyabrdegi tiyisli qararı menen elimizdiń ekonomikalıq hám sociallıq turmısında belsene qatnasıwǵa umtılıp atırǵan watanlaslarımızdı múnásip xoshametlew maqsetinde “Vatandosh” gúwalıǵı hám “Vatandosh” kartaları engizildi.
Bul nızam joybarı usı baǵdarda alıp barılıp atırǵan jumıslardıń logikalıq dawamı bolıp, onda sırt elde jasap atırǵan watanlaslarımızdı hár tárepleme qollap-quwatlaw baǵdarındaǵı ilajlardı dawam ettiriw maqseti názerde tutıladı. Joybar menen “Mámleketlik bajı haqqında”ǵı nızamnıń 13-statyasına “Vatandosh” kartası iyeleri hám olardıń shańaraq aǵzaları ushın migraciya hám puqaralıqtı rásmiylestiriw tarawında kórsetiletuǵın ayırım mámleketlik xızmetler ushın mámleketlik bajıdan azat etiliwin názerde tutatuǵın qosımshalar hám ózgerisler kirgizilmekte.
Sonıń ishinde, “Vatandosh” kartası iyeleri turǵan ornı boyınsha dizimnen ótkerilgende, olardıń shańaraq aǵzaları ámeldegi viza múddetin kóp mártebe etip sozǵanda, sonday-aq, turǵan ornı boyınsha dizimnen ótkerilgende hám dizimnen ótkeriw múddetin sozǵanda mámleketlik bajıdan azat etiliwi názerde tutılmaqta.
Nızam joybarında názerde tutılıp atırǵan normalar sırt elde jasap atırǵan watanlaslarımızǵa Ózbekstan aymaǵında professional, sonıń ishinde, isbilermenlik, investiciyalıq, ilimiy, aǵartıwshılıq hám mádeniy jumıs penen shuǵıllanıwı ushın qolaylı huqıqıy, sociallıq sharayatlardı jaratıwǵa xızmet etedi.

Muhtarama Komilova, ÓzA