AQSh Prezidenti Donald Tramp Ukrainaǵa “Tomahawk” markalı uzaq aralıqqa ushatuǵın qanatlı raketalar jiberiw itimalı bar ekenligin bildirgen. Bul qarar Rossiya menen urısta jańa basqıshtı baslap beriwi múmkin.

Tramp jurnalistler menen sáwbette, “Kóremiz… itimal, solay islermiz, dedi. Bul bildiriw Prezident Vladimir Zelenskiy menen ótken hápte aqırında bolıp ótken ekinshi telefon sóylesiwinen soń jańladı. Sóylesiw waqtında Zelenskiy Vashingtonnan Ukraina armiyasınıń hawa qorǵanıwı hám uzaq aralıqtan soqqı beriw sistemasınıń imkaniyatın kúsheytiwdi soraǵan.
Usı baslama ámelge assa, 2 500 kilometrge shekem jetip baratuǵın “Tomahawk” raketaları menen Moskvaǵa soqqı beriw imkaniyatı payda boladı. Moskva bolsa bul “jaǵdaydı ayrıqsha keskinlestiriwi”, AQSh-RF qatnasıǵın jáne de jamanlastırıwı múmkin ekenin bildirdi.
Ukraina basshılıǵı bir neshe aydan berli Batıstan uzaq aralıqqa mólsherlengen qural-jaraq sorap kelmekte. Kievtiń atap ótiwinshe, Rossiya front artındaǵı qalalar boylap, atap aytqanda, energetika infrastrukturasına qaratılǵan kúshli raketa hám dron hújimlerin shólkemlestirmekte.
Tramptıń arnawlı wákili Kit Kellog ta jaqında “Fox news”ke bergen intervyuinde Prezident Rossiya aymaqlarına soqqı beriw pikirin maqullaǵanın aytqan.
Moskva bolsa bul itimaldı áhmiyetsiz, dep bahaladı. Yaǵnıy, Kreml wákili Dmitriy Peskov bılay dedi:
– “Tomahawk”pa, ya basqa raketa ma – parqı joq, urıstıń páti ózgermeydi.
Báribir, AQSh hám Rossiya qatnasıqlarında jańa sınaq dáwiri keldi, dep aytıw múmkin. Ukraina urıstıń tórtinshi jılına kirip, Batıstıń áskeriy qollap-quwatlawına barǵan sayın kóbirek mútáj bolmaqta.

Musulmon Ziyo, ÓzA