WAM málimleme agentligi, “Al-Khaleej”, “Emarat Al-youm”, “Al-bayan.ae” sıyaqlı jetekshi basılımlardıń bas rezidenciyası Birlesken Arab Ámirlikleri Dubay qalasında jaylasqan “DP World” xalıqaralıq logistika kompaniyası paytaxtımız hákimligi janındaǵı “Tashkent invest” filialı menen qospa kárxana dúzgenin sáwlelendirdi.

– Bul birge islesiw Ózbekstannıń logistika infrastrukturasın rawajlandırıw, respublikanı regionallıq sawda orayına aylandırıw jolındaǵı áhmiyetli qádem bolıp esaplanadı, – delinedi maqalada. – Yangi Hayot rayonındaǵı “Yangi avlod” arnawlı sanaat zonasında jaylasqan jańa terminal Oraylıq Aziya kóleminde baylanıs, nátiyjelilik hám biznes júrgiziw ushın qolaylıq jaratadı, mámleket ekonomikasınıń diversifikaciyası, sanaattıń rawajlanıwın qollap-quwatlaydı.
Shártnamaǵa bola, “Tashkent invest” qospa kárxanaǵa 15, “DP World” 85 procent úles qosadı. Úsh basqıshtan ibarat bul joybarǵa jámi 288 million dollar qaratıldı. Baslama sheńberinde shama menen 82 gektar maydandı iyeleytuǵın xalıqaralıq transport-logistika xabı jaratıladı.
Tashkent multimodal logistika terminalı quramında konteynerdegi hám perdelengen júk ushın temir joldan kiriw imkaniyatına iye qurǵaqlıqtaǵı port, bajıxana rásmiylestiriwi aymaǵı, avtotransport quralları ushın orın, júk mashinaları turatuǵın óz aldına maydan, zamanagóy qoymaxanalar, saqlaw múddetin qısqartıw esabınan tovar jetkerip beriw shınjırı arqalı háreketti tezlestiriwge mólsherlengen arnawlı tarqatıw orayları qurıladı.
Dáslepki basqıshta temir jol vokzalı, 2026-jıldıń aqırı-2027-jıldıń basına shekem 63 000 kvadrat metrlik qoymaxana kompleksi qurıladı. Keyin ala qosımsha jer maydanı ajıratılıp, qoymaxana aymaǵı 163 mıń kvadrat metrge jetkeriledi. Terminal arnawlı júk tasıw temir jol bándirgisi menen támiyinlenedi. Bul júkti qayta islew hám jetkerip beriw procesin tezlestiredi, logistika qárejetin azaytadı. Transport kesilispesi milliy temir jol tarmaǵı, iri avtomobil jolları hám Tashkent xalıqaralıq aeroportına tikkeley shıǵıw imkaniyatına iye bolıp, avtomobil, temir jol hám hawa transportında nátiyjeli multimodal júk tasıw imkaniyatın beredi.
Joybar arnawlı sanaat zonasında jaylasqanlıǵı sebepli logistika, óndiris hám eksporttı qayta islew ámeliyatın integraciyalawǵa járdem beriwshi bajıxana hám salıq jeńilligine iye boladı.
– Bul birgeliktegi joybar Ózbekstannıń Oraylıq Aziyadaǵı iri logistika hám sawda orayına aylanıw ideyasın qollap-quwatlawǵa sadıqlıǵımızdı tastıyıqlaydı, – dedi “DP World” kompaniyasınıń baslıǵı hám bas atqarıwshı direktorı Sultan Ahmad bin Sulayyim. – Tashkent multimodal logistika orayı regiondı jáhán dárejesindegi infrastruktura menen támiyinleydi, biznestiń hár qıylı baǵdarlarında intellektuallıq támiynat hám logistika imkaniyatın qollap-quwatlaydı.
Óz gezeginde, Tashkent qalasınıń hákimi Shavkat Umurzoqov bul kelisim transport-logistika xabınıń rawajlanıwınıń baslanıwı, paytaxttıń óndiris hám eksport potencialın sezilerli dárejede arttırıwın atap ótti.
Ulıwma, logistika hám portlardı basqarıw boyınsha dúnya kóleminde tán alınǵan tájiriybege ie “DP World” penen birge islesiw mámleketimiz ekonomikasına zamanagóy texnologiyalardı engiziw, iri investorlardı tartıw imkaniyatın beredi. Jáhán dárejesindegi infrastrukturaǵa iye Tashkent jergilikli hám xalıqaralıq kompaniyalardıń talabın qanaatlandırıw ushın jáne de kúshli potencialın kórsetedi. “DP World” tarmaǵı boylap júk háreketi ańsatlastırılıwı sebepli Tashkent terminalı Oraylıq Aziya, Jaqın Shıǵıs hám Evropa arasındaǵı áhmiyetli buwınǵa aylanadı.

Muharrama Pirmatova, ÓzA