Bajıxana komiteti “Jolawshı deklaraciyası” atlı mobil qosımshanı iske qostı. Endi puqaralar shegara punktlerinde bajıxana deklaraciyasın qaǵaz túrinde emes, onlayn tárizde hám ádewir ápiwayılastırılǵan tártipte toltırıwı múmkin.

Bajıxana komitetiniń málimleme xızmeti bul haqqında xabar berdi. Xabarda usı qosımshanıń abzallıqları hám funkciyaları haqqında maǵlıwmat keltirilgen. Atap aytqanda, qosımsha OneID arqalı sistemaǵa kirilgende, pasport maǵlıwmatları avtomatikalıq tárizde deklaraciyanıń tiykarǵı bólimlerine kirgiziledi. Paydalanıwshı tek kiriw-shıǵıw jónelisi, valyutalar, qımbat bahalı buyımlar hám basqa tovarlar haqqındaǵı maǵlıwmatlardı qolda kirgizedi.
Mobil qurılmalar ushın IMEI-kodtı skanerlew funkciyası bar bolıp, paydalanıwshı onı qolda terip kirgizbesten telefon kamerası arqalı skanerlep alıwı múmkin. Shegara postlarında biypul Wi-Fi zonaları shólkemlestirilgen hám ayırım orınlarda infokiosklar ornatılıwı rejelestirilgen. Bul bolsa smartfondan paydalana almaytuǵın jolawshılar ushın da elektron tárizde deklaraciya tapsırıw imkaniyatın beredi.
Házirgi waqıtta xızmet Tashkent xalıqaralıq aeroportında sınaq túrinde islemekte. 2025-jıl 1-noyabrden baslap, qosımshanıń paydalanıw sheńberi barlıq shegara punktlerine keńeytiledi.
Bul joybardıń áhmiyetli tárepi sonda, waqıt únemlenedi. Deklaraciyanı aldınnan toltırıw shegaradaǵı ótiw procesin biraz jeńillestiredi hám qaǵaz túrindegi qátelerdi azaytadı. Tınıqlıq hám qáwipsizlik. Sanlı sistema maǵlıwmatlardıń joǵalıwı yamasa ózgertiliwiniń aldın aladı. Telefonlardı deklaraciyalaw ańsatlasadı. Sırt elden alıp kelingen smartfonlardıń IMEI-kodı avtomatikalıq túrde sistemaǵa kirgiziledi. Nátiyjede qaǵaz jumısları azayadı. Elektron deklaraciya arqalı qaǵaz túrindegi hújjetler sanı keskin azayadı.
“Jolawshı deklaraciyası” qosımshasın Play Market hám App Store arqalı júklep alıw múmkin. Qosımshanıń imkaniyatları puqaralarǵa deklaraciyalaw procesin jáne de qolaylı hám tez orınlawǵa xızmet etedi.
Bajıxana komitetiniń maǵlıwmatına bola, bul qosımsha 2025-jıldıń aqırına shekem barlıq xalıqaralıq aeroportlar hám jer ústi ótiwshi shegara punktlerinde tolıq engiziliwi názerde tutılǵan.

Shahnoza Mamaturopova, ÓzA