Nókis qalasındaǵı 31-sanlı ulıwma bilim beriw mektebinde “Xojeli” shegara bajıxana postı hám Ózbekstan Jaslar awqamı wákilleri menen birgelikte jaslardıń huqıqıy sanasın hám mádeniyatın arttırıw, olardı watansúyiwshilik ruwxında tárbiyalaw ilajları sheńberinde huqıqbuzarlıqlardıń aldın alıwǵa baǵıshlanǵan profilaktikalıq sabaqlar shólkemlestirildi.

Ilajda oqıwshılar hám muǵallimler qatnasıp, huqıqıy sawatlılıqtı arttırıw, nızamlarǵa húrmet penen qatnas jasaw, sonday-aq, korrupciyaǵa qarsı gúresiw máseleleri boyınsha tolıq túsinikler berildi.
Ushırasıw dawamında korrupciyaǵa qarsı gúresiw tek ǵana huqıq qorǵaw uyımlarınıń emes, al hár bir puqaranıń minneti ekeni, korrupciya jámiyettiń rawajlanıwına tosqınlıq etiwshi illet ekeni ayrıqsha atap ótildi. “Para” usınıs etiw yamasa alıw jınayıy juwapkershilikke sebep bolatuǵını haqqında mısallar tiykarında túsinikler berildi.
Sonday-aq, ilaj qatnasıwshılarına pirotexnikalıq qurallar hám basqa da qadaǵan etilgen strategiyalıq tovarlardı mámleket aymaǵına nızamsız alıp kiriw yamasa ishki bazarda aylanısına jol qoyıw hákimshilik juwapkershilikke sebep bolatuǵını, bul ushın 2 million 60 mıń sumnan 4 million 120 mıń sumǵa shekem járiyma belgilenetuǵını haqqında maǵlıwmatlar jetkerildi.
Ushırasıw dawamında qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi