Qaraqalpaq mámleketlik quwırshaq teatrında Ózbekstan Respublikası Jaslar awqamı Oraylıq Keńesi hám Qurallı Kúshler quramındaǵı ministrlikler hám uyımlar menen birgelikte mámleketimizdiń arqa-batıs shegaraların qorǵawshı shegarashı jaslar arasında “Quwnaqlar hám ziyrekler” tańlawı bolıp ótti.

Maqset – qábiletli jaslardıń dóretiwshilik hám intellektuallıq potencialın júzege shıǵarıw hám kórkem óner tarawına qızıǵıwshılıq bildirgen jaslardıń qábiletin rawajlandırıw, sonıń menen birge, áskeriy xızmetkerlerdiń mádeniy dem alıwın támiyinlewden ibarat.
Tańlawda “Kewilli shegarashılar,” “Xorezmliler,” “Qadaǵalawshı áskerler” komandaları qatnasıp, olar “Sálemlesiw,” “Soraw-juwap,” “Muzıkalı shıǵıw” shártlerinde óz-ara bellesti. Tańlawdı “Quwnaqlar hám ziyrekler” associaciyasınıń wákilleri, MQX ShÁ sárkardalıǵı wákillerinen ibarat tóreshiler quramı bahalap bardı.
Tóreshiler quramı tárepinen qatnasıwshılardıń házilleriniń áhmiyetliligi, jarıs temasına tiykarlanǵanlıǵı, tamashagóytalaplıǵı, qatnasıwshılardıń atqarıw sheberligi, saxna mádeniyatına ámel etiwi, jarıstıń talap hám qaǵıydalarına qatań ámel etiwi sıyaqlı normalarǵa tiykarlanǵan halda bahalandı.
Házilge bay bolǵan jarısta qatnasıwshı komandalar jeńimpazlıq ushın shın kewilden háreket etti. Bul iygilikli umtılıs qatnasıwshılardıń hár bir shıǵıwınıń ráńbáreńligin támiyinledi hám eń múnásipleri saylap alındı.
Tańlawda birinshi orındı iyelegen “Qadaǵalawshı áskerler” komandası “Quwnaqlar hám ziyrekler” tańlawınıń kóshpeli kubogi, diplom hám bahalı sawǵalar menen sıylıqlanıp, tańlawdıń Mámleketlik qáwipsizlik xızmeti shegara áskerleri kóleminde bolıp ótetuǵın respublikalıq basqıshına jollama aldı.

Qaraqalpaqstan xabar agentligi