Nókis qalasındaǵı payızlı orınlardıń birinde xalıq xojalıǵınıń túrli tarawlarında jemisli miynet etken nuranıylar menen ushırasıw ótkerildi.

Onda Qaraqapaqstan Respublikası Joqarǵı Keńesiniń Baslıǵı A.Orınbaev, Ózbekstan Nuranıylar qorı basqarma baslıǵı S.Turdiev qatnastı.
Atap ótilgenindey, elimizdi jáne de rawajlandırıw, xalqımızdıń abadan turmısın tamiyinlew, kóp milletli xalqımızdıń awızbirshiligin saqlaw, jaslarımızdı ana-Watanǵa sadıqlıq ruwxında tarbiyalawda pidayı xızmet etip atırǵan nuranıylardıń miynetleri salmaqlı esaplanadı.
Ótkerilgen ilajda taraw veteranlarınıń, nuranıylardıń usınday iygilikli xızmetleri ayrıqsha tilge alındı.
Sonday-aq, xalıq xojalıǵınıń túrli tarawlarında jemisli miynet etken bir topar nuranıylarǵa Prezidentimizdiń arnawlı qararı menen shólkemlestirilgen «Mehnat faxriysi» kókirek belgisi, Joqarǵı Keńes Prezidiumınıń qararı menen «Ardaqlı nuranıy», «Ibratlı hayal» hám «Watan pidayısı» kѳkirek belgileri tapsırıldı.
Ilaj kórkem óner hám mádeniyat xızmetkerleri atqarıwındaǵı koncert baǵdaraması menen dawam etti.

Qaraqalpaqstan xabar agentligi