Yaponiya – bul tek ǵana aldınǵı texnologiyalar, zamanagóy qalalar hám bay mádeniy miyras penen belgili mámleket emes, al dúnyada eń uzaq jasaytuǵın xalıqqa iye, ózine tán dástúrler hám zamanagóylik úylesken orın sıpatında da tanılǵan. Yaponiyanıń paytaxtı Tokio dúnyanıń eń iri qalalarınan biri bolıp, hár jılı millionlaǵan turistlerdi ózine tartadı.

Bul mámleket miynet súygishligi, tártip-intizam, nátiyjelilik hám joqarı sapalı bilimlendiriw sisteması menen de dúnya kóleminde tanılǵan. Sonday-aq, Yaponiya turizm hám isbilermenlik ushın oǵada kóplegen imkaniyatlar jaratadı, sonıń ushın da pútkil dúnyada, sonıń ishinde, Ózbekstan puqaralarında da úlken qızıǵıwshılıq oyatpaqta.
Milliy statistika komitetiniń maǵlıwmatlarına bola, 2025-jıldıń yanvar-iyul aylarında Yaponiyaǵa turistlik maqsetlerde barǵan ózbekstanlılar sanı sezilerli dárejede arttı. Jámi 1,7 mıń ózbekstanlı Yaponiyaǵa sapar etken, bul ótken jıldıń usı dáwirine salıstırǵanda 1,6 esege kóp degeni.
Ósiw pátleri dıqqatqa ılayıq, sebebi 2024-jıldıń birinshi jeti ayında bul kórsetkish tek ǵana 663 ke artqan. Bul bolsa, óz gezeginde, Yaponiyaǵa bolǵan talap hám qızıǵıwshılıq artıp atırǵanınan dárek beredi.
Tómende Yaponiyaǵa sapar etiw maqsetlerin kóriwimiz múmkin: sayaxat – 1 407, tuwısqanlardı kóriw – 196, oqıw – 103, xızmet babında – 28 hám emleniw maqsetinde – 4 adamdı quraydı.
Bul maǵlıwmatlardan kórinip turǵanınday, tiykarǵı massa sayaxat maqsetinde Yaponiyaǵa barǵan. Bul bolsa mámlekettiń tábiyǵıy gózzallıqları, áyyemgi tariyxıy orınları hám rawajlanǵan turizm infrastrukturasına qızıǵıwshılıqtıń artqanınan derek beredi. Sonday-aq, tuwısqanların kóriw hám bilim alıw maqsetinde saparǵa shıǵıwshılar sanınıń artıwı sociallıq hám mádeniy baylanıslardıń bekkemleniwinen de derek beredi.
Yaponiyaǵa ózbekstanlılardıń sayaxatınıń kóbeyiwi mámleketler arasındaǵı mádeniy hám ekonomikalıq baylanıslardı jáne de bekkemleydi. Bul process eki tárep ushın da jańa imkaniyatlar esigin ashadı, ózbekstanlılar ushın bilimlendiriw hám jumıs imkaniyatları keńeyedi. Yaponiya bolsa óz mádeniyatı hám ekonomikasın jana bazarlar arqalı jáne de rawajlandıradı. Sonday-aq, mámleket ishindegi turizm tarawınıń rawajlanıwı ushın da jańa baǵdarlar ashılıwı múmkin. Ózbekstanlı turistlerdiń Yaponiyaǵa qızıǵıwshılıǵı jáne de artıwı kútilmekte, bul bolsa eki tárepleme baylanıslardıń jáne de tereńlesiwine tiykar jaratadı.
2025-jıldıń birinshi jeti ayında Yaponiyaǵa sapar etken Ózbekstanlılar sanınıń 1,6 esege artıwı mámleketler arasındaǵı qatnasıqlardıń jańa dárejesin kórsetpekte. Bul ósiw turizm, bilimlendiriw, mádeniyat hám ekonomika tarawlarında jańa imkaniyatlar jaratpaqta. Sonıń menen birge, keleshekte bul baǵdardaǵı birge islesiw jáne de kúsheyiwi kútilmekte, sebebi Yaponiyanıń jetilisken infrastrukturası hám ózbekstanlılar arasında artıp atırǵan qızıǵıwshılıq bul processti jedellestirmekte.

Dildora DWSMATOVA, ÓzA
ÓzA