Balıqshılıq tarawınıń rawajlanıwı ishki bazarda balıq ónimleriniń arzan bolıwına hám xalıqtıń tutınıwı ushın óz waqtında jetkereliwine sebep boladı. Tábiyiy hám jasalma kóllerde jetistirilip atırǵan balıqlar, búgin ishki bazarda satılıwı jolǵa qoyılǵan.

«Abay» awıl puqaralar jıyınında «Beruniy Gold Fish» juwapkershiligi sheklengen jámiyeti tárepinen 50 gektar maydanda jasalma háwiz shólkemlestirilgen. Búgingi kúnde sonnan 6 gektar basseynde jılına 80 tonna balıq jetistirilip, respublikamızdıń barlıq qala hám rayonlarına jetkerip beriliwi jolǵa qoyılǵan. Balıqshılıqta tájiriybege iye bolǵan isbilermen bul baǵdardı jáne de rawajlandırıwdı maqset etken.
Rayonlıq málimleme xızmetiniń maǵlıwmatına qaraǵanda, rayonda 81 balıqshılıq subektleri bolıp, usı balıqshılıq xojalıqlarında jámi 212 gektar suw háwizleri bar. 2025-jılı balıqshılıqtı rawajlandırıw boyınsha ámelge asırılatuǵın ilajlar baǵdarlamasında jasalma suw basseynlerinen 636 tonna, tábiyiy suw háwizlerinde 6 tonna, intensiv suw háwizlerinen 579 tonna, jámi 1 mıń 221 tonna balıq jetistiriw belgilep berilgen. Búgingi kúnde balıqshılıq xojalıqları jetistirgen balıqlardı awlaw jumısların baslaǵan.

Qaraqalpaqstan xabar agentligi