Nókis suw tazalaw obektiniń rekonstrukciyadan keyingi qayta paydalanıwǵa tapsırılıwı múnásibeti menen ashılıw máresimi ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám «Wzsuvtaminot» jámiyeti basqarıwı baslıǵı Axmad Suvankulov jıynalǵanlardı rekonstrukciyadan shıqqan jańa obekttiń paydalanıwǵa tapsırılıwı menen qutlıqlap, sońǵı jılları húrmetli Prezidentimizdiń basshılıǵında elimizde, sonıń ishinde Qaraqalpaqstanda júz berip atırǵan iri ózgeris hám jańalanıwlardı úlken qanaatlanıwshılıq penen atap ótti.
Sonı atap ótiwimiz kerek, aldın «Nѳkis suw tazalaw» obektiniń ulıwma quwatlıǵı boyınsha sutkasına 60 mıń kub metr suw jetkerip beriletuǵın bolsa, Ózbekstan Respublikası Prezidentiniń arnawlı qararı tiykarında, bul obektke 86,6 mlrd. sumlıq rekonstrukciya jumısları alıp barılıp, suw jetkerip beriw kórsetkishi 90 mıń kub metrge jetkerildi. «Nѳkis suw tazalaw» obekti endigiden bılay 279 mıń xalıqqa emes, 340 mıńnan aslam turǵınlardı taza ishimlik suwı menen támiyinleydi.
Bunnan tısqarı, Nókis qalası, Taqıyatas hám Xojeli rayonlarında Jáhán bankiniń 78 mln. dollarlıq qarjıları esabınan 286 kilometr kanalizaciya tarmaqları hám obektlerinde qurılıs jumısları baslanbaqta. Sonday-aq, Ámiwdárya, Beruniy, Qaraózek, Qońırat, Moynaq hám Nókis rayonlarında Aziya rawajlanıw bankiniń 145 mln. dollarlıq qarjıları esabınan ishimlik suw támiynatın jaqsılaw jumısları dawam ettirilmekte.
Ótkerilgen saltanatlı ilajda «Wzsuvtaminot» jámiyeti tárepinen suw tazalaw obekti hám aqaba suw tarmaqları kárxanalarına arnawlı avtotransport quralları tapsırıldı.
Sońınan ilaj qatnasıwshıları obektte ámelge asırılǵan jumıslar menen jaqınnan tanıstı.

Qaraqalpaqstan xabar agentligi