Usı jıldıń 6-7-oktyabr kúnleri Belarus Respublikasınıń paytaxtı Minsk qalasında bolıp ótken «Antikontrafakt-2025» XIII Xalıqaralıq forumı sheńberinde Ózbekstan tutınıwshılardıń huqıqların qorǵaw jámiyetleri federaciyası hám Belarus Tutınıwshılardı qorǵaw jámiyeti arasında birge islesiw haqqındaǵı Memorandumǵa qol qoyıldı.

Bul hújjet eki mámleket arasında tutınıwshılardıń huqıqların qorǵaw tarawındaǵı birge islesiwdi jáne de rawajlandırıw, óz-ara tájiriybe almasıw, sonday-aq, transshegaralıq múrájatlar, elektron sawda hám turizm baǵdarlarında birgeliktegi baslamalardı ámelge asırıwǵa qaratılǵan.
Ilajda eki shólkemniń basshıları, taraw qánigeleri hám ǵalaba xabar qurallarınıń wákilleri qatnastı. Ushırasıw waqtında tárepler tutınıwshılardıń huqıqların qorǵaw sistemasın jetilistiriw, jámiyetlik qadaǵalawdı kúsheytiw hám sanlastırıw arqalı puqaralardıń máplerin nátiyjeli támiyinlew máseleleri boyınsha pikir alıstı.
Belarus Tutınıwshılardı qorǵaw jámiyetiniń baslıǵı Anna Susha óziniń shıǵıp sóylegen sózinde Ózbekstan Tutınıwshılardıń huqıqların qorǵaw jámiyetleri federaciyası keyingi jılları tutınıwshılardıń huqıqların támiyinlew tarawında ámelge asırıp atırǵan sistemalı reformalar, xalıqtıń xabardarlıǵın arttırıwǵa qaratılǵan keń kólemli jumıslar hám mámleketlik uyımlar menen nátiyjeli birge islesiw arqalı dúnya kóleminde múnásip abırayǵa iye bolıp atırǵanın atap ótti.
Ushırasıw dawamında tárepler tutınıwshılardıń múrájatların kórip shıǵıwda zamanagóy elektron platformalardan paydalanıw, eki mámleket puqaralarınıń qatnasıwındaǵı transshegaralıq sawda kelispewshiliklerin jedel sheshiw mexanizmlerin engiziw, sonday-aq, kadrlardıń mamanlıǵın arttırıw hám oqıw baǵdarlamaların shólkemlestiriw máseleleri boyınsha kelisip aldı.
Memorandumǵa qol qoyılıwı hár eki shólkem arasındaǵı ámeliy birge islesiwdi jańa basqıshqa alıp shıǵıw, birge islesiw sheńberinde qospa ilajlar, seminarlar hám jámiyetlik monitoringler ótkeriw ushın bekkem huqıqıy tiykar jaratıwı menen áhmiyetli.
Sonday-aq, tárepler kelisimdi ámelge asırıw sheńberinde turaqlı jumısshı topar dúziw, málimleme almasıw sistemasın jolǵa qoyıw hám xalıqaralıq tutınıwshılar shólkemleri sheńberinde birgeliktegi baslamalardı alǵa qoyıw boyınsha da kelisimge eristi.

Hamroz Bayanov, ÓzA