Ózbekstan Respublikası Prezidentiniń 2024-jıl 19-iyuldegi «Siyasiy repressiya qurbanı bolǵan watanlaslarımızdıń ómiri hám jumısın úyreniw, úgit-násiyatlaw hám olardıń esteligin máńgilestiriw baǵdarındaǵı jumıslardı keńeytiw haqqında»ǵı PQ-270-sanlı qararında, hár jılı oktyabr ayınıń birinshi on kúnligi mámleketimizde «Siyasiy repressiya qurbanların eslew» hápteligi etip belgilew kórsetilgen edi.

Usı múnásibet penen 2-10-oktyabr kúnleri Berdaq atındaǵı Qaraqalpaq mámleketlik universitetiniń baslaması menen Repressiya qurbanları esteligi muzeyinde háptelik sheńberindegi ruwxıy-aǵartıwshılıq ilaj shólkemlestirildi.
Ilajda universitettiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov, Respublikalıq Ruwxıy-aǵartıwshılıq orayı Qaraqalpaqstan Respublikası bóliminiń baslıǵı T.Atamuratov, “Nuranıy” qorı Qaraqalpaqstan Respublikası bóliminiń baslıǵı T.Abdidjabbarov, sonday-aq, universitettiń belsendi student-jasları hám muzey xızmetkerleri qatnastı.
Ilajda sózge shıqqanlar mámleketimizde repressiya jılları dáwirinde pútkil ómirin xalıq, Watan hám ádillik jolında pidá etken mıńlaǵan watanlaslarımızdıń esteligi qádirlenip, olardıń atı máńgilestirilip atırǵanı haqqında aytıp ótti. Sonday-aq, jaslar qálbinde milliy maqtanısh, tariyxıy estelik hám Watanǵa sadıqlıq sezimin kúsheytiwde ruwxıy-aǵartıwshılıq ilajlardıń turaqlı ótkeriliwi úlken áhmiyetke iye ekenin atap ótti.
Ótkerilgen ilaj dawamında muzey xızmetkerleri tárepinen siyasiy repressiya dáwirine baylanıslı tariyxıy hújjetler, fotosúwretler, arxiv materialları hám eksponatlar tiykarında tolıq maǵlıwmatlar berildi.
Studentler ótmishtegi qayǵılı waqıyalar menen jaqınnan tanısıp, olardan ózlerine úlken ruwxıy sabaq aldı.

Qaraqalpaqstan xabar agentligi