Xalıqaralıq Aralboyı innovaciya orayınıń Nókis rayonındaǵı ǵálle hám miywe-ovoщ jetistiriwge mólsherlengen atızında “Suwdı únemleytuǵın texnologiyalardıń abzallıqları hám jeńillikleri” atamasında kórgizbeli seminar ótkerildi.

Ilajda Xalıqaralıq Aralboyı innovaciya orayınıń direktorı B.Habibullaev Qaraqalpaqstanda suwdı únemlewshi texnologiyalardı engiziw zárúrligi hám erisilip atırǵan nátiyjeler haqqında tolıq maǵlıwmat berdi.
Sonday-aq, seminarda Awıl xojalıǵı ministrligi janındaǵı Agrosanaattı rawajlandırıw agentligi Qaraqalpaqstan Respublikası bóliminiń baslıǵı Q.Achilov, Suw xojalıǵı ministrliginiń sektor baslıǵı A.Qidirbaev hám basqalar shıǵıp sóylep, suwdı únemleytuǵın texnologiyalardı engizgen awıl xojalıǵı ónimlerin jetistiriwshilerge tiyisli qararlar tiykarında jeńillikler berilip atırǵanı haqqında keń túrde maǵlıwmat berip ótti.
Atap ótilgenindey, suwdı únemlewshi texnologiyalardı engiziw boyınsha Nókis rayonında da bir qatar jumıslar ámelge asırılmaqta. Sonıń ishinde, ótken 2021-2025-jıllar dawamında 6 fermer xojalıǵı tárepinen 110 gektar maydanǵa tamshılatıp, 12 fermer xojalıǵı 362 gektar egislik maydanlarına jawınlatıp suwǵarıw texnologiyaları engizilgen.
Suwshılar, qurılısta jumıstı bólip alıp islewshi kárxanalardıń wákilleri hám awıl xojalıǵı ónimlerin jetistiriwshiler qatnasqan ilaj juwmaǵında juwapkerlerge suwdı únemlewshi texnologiyalardıń abzallıqların keńirek túsindiriw hám qárejetlerdiń bir bólegin mámleketlik byudjet esabınan subsidiya tiykarında qaplap beriw tártipleri engizilgenin keńirek túsindiriw boyınsha tapsırmalar berildi.
Ilaj qatnasıwshıları atızǵa ornatılǵan suwdı únemlewshi texnologiya hám onıń islew processleri menen jaqınnan tanıstı. Bul texnologiyanı ornatıwǵa qızıǵıwshılıq bildirgenler qánigelerden ózlerin qızıqtırǵan sorawlarına hár tárepleme juwaplar aldı.

Qaraqalpaqstan xabar agentligi