Ózbekstan Respublikası Prezidentiniń «Ayırım rayon (qala) hám máhállelerdi xalıqtıń jasawı hám isbilermenlik jumısı menen shuǵıllanıwı ushın úlgili aymaqqa aylandırıw ilajları haqqında»ǵı qararı qabıl etildi.

Qararǵa bola, 33 qala hám rayonlarǵa, sonıń ishinde, respublikamızdıń Qońırat hám Shımbay rayonlarına «Jańa Ózbekstan kelbetindegi rayon (qala)» statusı berilgen bolıp, bul rayonlar xalıqtıń jasawı hám isbilermenlik jumısı menen shuǵıllanıwı ushın úlgili aymaqlarǵa aylandırıladı.
Prezident qararı tiykarında, bul aymaqlardıń 14 ine 30 mlrd sumnan, 18 ine 100 mlrd sumnan hám Narın rayonı Shorariq máhállesine 10 mlrd sum qarjı ajıratıladı.
«Jańa Ózbekstan kelbetindegi rayon (qala)» joybarı sheńberinde hár jılı, sonıń ishinde, keminde 50 million AQSh dolları ekvivalentindegi investiciyalardı tartqan halda azıq-awqat, mebel qurılısı, qurılıs materialları, tigiwshilik hám basqa da qánigelesken baǵdarlarda kem degende 10 iri investiciyalıq joybarlar iske qosıladı. Burın óz ónimi menen sırtqı bazarlarǵa shıqpaǵan kem degende 3-5 kárxana eksport iskerligine tartılıp, sırt mámleketlerden texnolog, marketolog, brend-menedjer sıyaqlı qánigelerdi tartqan halda kem degende 1 kárxanada milliy brend ónimlerin islep shıǵarıw jolǵa qoyıladı.
Sonday-aq, usı aymaqlardıń hár birinen 10 isbilermen sırt mámleketlerde ótkeriletuǵın qánigelestirilgen sanaat kórgizbelerine tájiriybe almasıw ushın jiberiledi.
«Jasıl» hám energiya nátiyjeli aymaqlardı rawajlandırıw sheńberinde bolsa, 2026-jıl 1-yanvardan baslap barlıq mámleketlik uyımlar hám sociallıq taraw mákemeleriniń imaratları tek ǵana energiya nátiyjeliligi principleri tiykarında qurıladı hám modernizaciyalanadı.
2027-jıl 1-yanvarǵa shekem mámleketlik uyımlar, mámleket qatnasıwındaǵı kárxanalar hám sociallıq taraw mákemeleri energiya nátiyjeli úskeneler menen tolıq támiyinlenedi.
2026-jıl 1-marttan baslap usı aymaqlardan birewden sociallıq taraw mákemesiniń imaratların «Nol energiya jumsaytuǵın imaratlar» koncepciyası tiykarında modernizaciyalaw boyınsha pilot joybarlar baslanadı.
Bunnan tısqarı, Qaraqalpaqstan Respublikası hám wálayatlardaǵı shetki rayonlarda 2 máhállege «Jańa Ózbekstan kelbetindegi máhálle” statusın berip, olarǵa qala ortalıǵı hám jasaw sharayatların alıp kiriw boyınsha jańasha qatnaslar ámeliyatqa engiziledi.

Qaraqalpaqstan xabar agentligi