Tashkent qalasında “Kiberqáwipsizlik sammiti – Oraylıq Evraziya, CSS 2025” III xalıqaralıq kiberqáwipsizlik sammiti bolıp ótti.

Ilajǵa Sanlı texnologiyalar ministriniń birinshi orınbasarı Oleg Pekos qatnastı.

Sammit “Kiberqáwipsizlik orayı” tárepinen “Dialogue Events” kompaniyası menen birgelikte shólkemlestirildi. Onda 25 ten aslam mámleketten 40 tan aslam bayanatshı qatnasıp, kiberqáwipsizlik tarawındaǵı áhmiyetli máseleler, jańa sheshimler, qáwip-qáterler hám xalıqaralıq birge islesiw baǵdarları boyınsha pikir alıstı.

Ilajda AQSh, Ullı Britaniya, Rossiya, Yaponiya, Ázerbayjan, Singapur, Vengriya, Italiya, Túrkiya, Gruziya, Túrkmenstan, Tájikstan, Qazaqstan sıyaqlı mámleketlerdiń tártipke salıwshı uyımları hám xalıqaralıq shólkemler – FIRST hám SABABA wákilleri qatnastı.

Sammittiń tiykarǵı maqseti regionallıq kiber jámiyetshilik ushın óz-ara tájiriybe almasıw, zamanagóy sheshimlerdi kórsetiw hám jańa imkaniyatlar jaratıwǵa xızmet etetuǵın joqarı dárejedegi interaktiv platformanı qáliplestiriwden ibarat boldı.

Ilaj sheńberinde “CyberQuiz” viktorinası da shólkemlestirildi. Onda qatnasıwshılar test sorawlarına juwap berip, “Áwmetli dóńgelek”ti aylandırıw hám estelik sawǵaların qolǵa kirgiziw imkaniyatına iye boldı.
Bul sammit kiberqáwipsizlik tarawında xalıqaralıq birge islesiwdi bunnan bılay da bekkemlew, jańa texnologiyalıq kózqaraslardı engiziw hám regionda sanlı turaqlılıqtı támiyinlew jolında áhmiyetli qádemlerden biri boldı.

Nigora RAHMONOVA, ÓzA xabarshısı