Ózbekstan Respublikası Prezidenti Shavkat Mirziyoev 9-oktyabr kúni ámeliy sapar menen Tájikstan Respublikasına keldi.

Dushanbe xalıqaralıq aeroportında mámleketimiz basshısın Tájikstan Respublikası Bas ministri Kohir Rasulzoda hám basqa rásmiy shaxslar kútip aldı.
Sol kúni Ózbekstan Respublikası Prezidenti Shavkat Mirziyoev hám Tájikstan Respublikası Prezidenti Emomali Rahmonniń ushırasıwı bolıp ótti.
Sóylesiw aldında Ózbekstan jetekshisi Tájikstan Prezidentin Ǵárezsiz Mámleketler Doslıq Awqamına basshılıǵı nátiyjeli bolǵanı menen qızǵın qutlıqladı hám “Oraylıq Aziya – Rossiya” formatındaǵı bolajaq ushırasıw hám ǴMDA sammiti tabıslı ótiwin tiledi.
Ózbekstan menen Tájikstan arasındaǵı doslıq, jaqsı qońsıshılıq, strategiyalıq sheriklik hám awqamlaslıq qatnasıqların jáne de keńeytiw hám bekkemlewdiń áhmiyetli máseleleri kórip shıǵıldı.
Eki tárepleme birge islesiw unamlı pát penen rawajlanıp atırǵanı úlken qanaatlanıwshılıq penen atap ótildi. Tovar almasıw hám júk tasıw kólemi, aviaqatnawlardıń sanı artıp barmaqta.
Óz-ara sawdanı kóbeytiw, sanaat, energetika, awıl xojalıǵı hám basqa tiykarǵı baǵdarlarda kooperaciya joybarların alǵa qoyıw boyınsha muwapıqlastırılǵan ilajlardı qabıl etiwge ayrıqsha itibar qaratıldı.
Jedel mádeniy-gumanitarlıq almasıw hám nátiyjeli aymaqlararalıq qatnasıqlardı dawam ettiriw áhmiyetli ekenligi atap ótildi.
Xalıqaralıq hám regionallıq áhmiyetke iye tiykarǵı máseleler, sonıń ishinde, usı jıl noyabr ayında Tashkent qalasında ótkeriletuǵın Oraylıq Aziya mámleketleri basshılarınıń Másláhát ushırasıwına tayarlıq kóriw boyınsha tolıq pikir alısıldı.

ÓzA