Jaqında “Milliy tiklanish” demokratiyalıq partiyası Qaraqalpaqstan Respublikası Keńesi baslıǵı, Joqarǵı Keńes deputatı T.Romanov, Xalıq deputatları Xojeli rayonlıq keńesiniń deputatları hám bir qatar juwapker shólkemlerdiń wákilleri Xojeli rayonı «Súwenli» mákan puqaralar jıyınında xalıq penen ushırasqan edi.

Ushırasıw dawamında Nókis-Xojeli avtomobil jolında “Súwenli” kanalınan ótip turǵan kópirdiń eki tárepindegi piyadalar jolı jaramsız jaǵdayǵa kelip qalǵanı, nátiyjede hár kúni mektepke qatnaytuǵın oqıwshılar avtomobil jolınan júriwge májbúr bolıp atırǵanı haqqında múrájat kelip túsip, usı múrájattı sheshiw ushın deputat tárepinen Qaraqalpaqstan Respublikası Avtomobil jolları aymaqlıq basqarmasına deputatlıq sorawı jiberildi.

Kóp ótpey bul mashqalanı sheshiw ilajları baslanıp, házirgi kúnde kópirde ońlaw jumısları ámelge asırılmaqta. Ońlaw jumısları juwmaqlanǵannan soń xalıqqa, ásirese, mektepke qatnaytuǵın oqıwshılarǵa qolaylıq jaratılıp, olardıń qáwipsizligi támiyinlenedi.

Deputat tárepinen saylawshılar menen ótkerilgen ushırasıwlarda anıqlanǵan basqa da mashqalalardı sheshiw ilajları kórilip, deputatlıq qadaǵalaw ámelge asırılmaqta.

Qaraqalpaqstan xabar agentligi